Kryeministri Edi Rama inspektoi mesditën e të mërkurës kantierin e rindërtimit në Laç, së bashku me ministrin turk të Urbanizimit dhe Mjedisit, Murat Kurum, dhe ministrin për Rindërtimin, Arben Ahmetaj.
Banesat e zonës 1 të dëmtuara nga tërmeti i 26 nëntorit 2019, po financohen nga qeveria turke, kurse zona 2 nga qeveria shqiptare.
Gjatë inspektimit, kryeministri Edi Rama nuk i kurseu batutat me ministrin turk, Murat Kurum. Kurum i tha ndër të tjera se “kështu siç po ecin punët do t’ia kaloni edhe Tiranës”.
PJESË NGA BASHKËBISEDIMI
Ministri Murat Kurum: Punojmë me 250 persona staf për momentin. Dëshira është që në muajin shtator, të përfundohen të gjitha punimet. Punimet po vazhdojnë pa bërë asnjë kompromis sa i përket cilësisë.
Kryeministri Rama: Do ta transformojë komplet qytetin. Edhe puna që po kryhet është shumë cilësore. Ky është heroi i këtij projekti. Këtë duhet ta ngrini në detyrë pas këtij projekti.
Ministri Ahmetaj: Inshallah thotë ai se s’ia jep fjalën
Kryeministri Rama: Jo inshallah jo! Këtë e ke në dorë ti, Allahu ka në dorë punë të tjera. Doli një problem me metodologjinë dhe kanë bërë një punë fantastike. Ai Serveti aty. Kjo është pjesë e infrastrukturës që po bëjmë ne dhe këtu do ndërtohen edhe 200 apartamente të reja me financimin tonë.
Ministri Murat Kurum: Siç po ecin punët do t’ia kaloni edhe Tiranës!/ Opinion.al
