Është përuruar laboratori i parë i Inteligjencës Artificiale në shkollën , “Sami Frashëri”. I pranishëm në këtë përurim ishte dhe kryetari i Bashkisë së Tiranës, Erion Veliaj, i cili tha se ky projekt do të realizohet edhe në disa shkolla të tjera.
Po ashtu, laboratori u vizitua edhe ministrja e Arsimit Evis Kushi dhe drejtuesi i AADF-së, Michael Granoff.
“Për mua është krenari shumë e veçantë që, këtë projekt, e fillojmë te “Sami Frashëri”. Kur unë kam bërë gjimnazin në godinën e vjetër, në vitet 1994-1998, duhet të bëje çmos që të shkoje te klasa e gjermanishtes. Pra, mësoje anglishten, kurse gjermanishtja ishte kursi i dytë. Ishte fat i veçantë të ishe pjesë e atyre 20 vetave, që të mësoje gjermanisht. Ishte një biletë për t’u integruar në një botë të civilizuar. Ndërkohë, për prindërit tanë, në kohën e komunizmit bileta ishte rusishtja. Ishte një mënyrë për të ecur përpara në atë sistem. Sot, nëse nuk di gjuhën e kodimit ‘Python’, nuk ke biletë për t’u ngjitur më lart në jetë. Qartazi, gjuhët e së sotmes nuk janë më gjermanishtja dhe anglishtja. Me gjithçka po ndodh, gjuhët që duhet të mësojë brezi juaj janë ‘Python’ dhe ‘Java’. Ne kemi 10 shkolla, 8 në Tiranë dhe 2 jashtë Tirane, por unë dhe ministrja do të sigurohemi që këtë shembull të mirë ta shtrijmë edhe në qytete të tjera, pasi unë besoj se e gjithë Shqipëria duhet të jetë një ‘start up nation’ – jam i sigurt është vetëm çështje kohe që edhe bashkitë e tjera ta ndjekin këtë shembull. E gjitha është në dorën tuaj, ndaj mezi pres të brohoras suksesin dhe arritjet tuaja”,- tha Veliaj.
Kreu i Bordit te AADF, Michael Granoff, tregoi si u përzgjodh Shqipëria për të realizuar këtë projekt të rëndësishëm.
“Kur e nisëm, ajo çfarë menduam se duhet të bënim, ishte të identifikonim problemet dhe mënyrat se si të rregullonim jetën e shqiptarëve në plan aftatgjatë dhe gjëja e dytë ishte të kërkonim modelet më të mira në botë, t’i sillnim në Shqipëri dhe t’i adaptonim.
Asnjëri nga ne nuk e kishte imagjinuar që “INTEL” mund të zgjidhte Shqipërinë për një projekt pilot; kush e kishte menduar, shumë vite më para që kjo mund të ndodhte. Aftësia jonë për të bindur “INTEL” për të krijuar këtë program është shenjë se çfarë ne mund të bëjmë së bashku.
Qëllimi tjetër që kishim dhe që ishte shumë i vështirë për t’u arritur vetëm, jo vetëm duhet të krijonim partneritet ndërmjet fondacionit dhe një kompanie si “INTEL”, por ne duhet të krijonim konsorciume dhe partnership mes aktorëve kryesorë,” u shpreh Granoff.
Që nga miratimi i saj në dhjetor 2019, Akademia e Kodimit ka pasur një ndikim të madh në drejtim të arsimimit dhe punësimit në Shqipëri.
