E ardhmja e Antonio Kontes është thuajse e vendosur, drejt Çelsit. Trajneri që do të drejtojë Italinë në europianin “Francë 2016”, pritet të lërë stolin në përfundim të këtij kompeticioni për të marrë drejtimin e “Bluve të Londrës”.
Për këtë, mediat italiane prej kohësh kanë nisur të rendisin emrat e trajnerëve që pritet të ulen në stolin e Kombëtares axurre. E fundit është “La Republica”, që ka zgjedhur një mënyrë tjetër trajtimi të kësaj çështjeje.
Jo vetëm lajme mbi të ardhmen e Kombëtares italiane, por edhe sondazhe. Në një të tillë të paraqitur në faqen online të këtij mediumi, përfshihet edhe emri i trajnerit aktual të Kombëtares shqiptare.
Në mendimin që prestigjiozja italiane kërkon nga tifozët axurrë, është edhe Xhani De Biazi. Edhe pse në votimet e hapura prej pak ditësh trajneri i kuqezinjve nuk ka marrë shumë vota, interesant është fakti që tashmë De Biazi është një nga kandidaturat e marra gjerësisht në konsideratë nga shtypi sportiv italian.
