A.Biskun, 58 vjeç, është shqiptari që humbi jetën si pasojë e një aksidenti në vendin ku po punonte. Ai la pas bashkëshorten dhe dy fëmijët.
Sipas mediave italiane, 58-vjeçari Bisku ka shprehur në të shkuarën dëshirën që të varroset në atdhe.
Në vitin 1991 ai la qytetin e Kavajës për të shkuar në Itali. Ai po punonte për një kompani në rinovimin e një ndërtese. Teksa po shkatërronte një tarracë të vogël brenda rrethimit të brendshëm të ndërtesës ai ra nga një lartësi prej 3 metrash dhe përplasi kokën.
Një prej trarëve që mbanin papafingon është gjetur e thyer. Në atë moment ai ishte vetëm dhe nuk ka dëshmitarë, por me shumë mundësi ky është shkaku i aksidentit, sipas mediave italiane.
Për ngjarjen kanë nisur hetimet pasi Bisku u gjet pa kaskën mbrojtëse dhe do të kontrollohet nëse duhej të ishte e detyrueshme mbajtja e një të tillë në atë lloj pune që po bënte.
