Është ndarë nga jeta në moshën 86-vjeçare regjisori i shquar shqiptar, Piro Milkani, një prej emrave më të rëndësishëm të kinematografisë shqiptare.
Piro Milkani lindi më 9 dhjetor 1939 në qytetin e Korçës.
Milkani ishte regjisori i mbi 20 produkteve kinematografike shqiptare, duke përmendur kështu: “Zonja nga qyteti”, “Një shoqe nga fshati”; “Pranvera s’erdhi vetëm”, “Ballë për ballë”, “Shtigje lufte”, “Militanti”, “Trishtimi i zonjës Shnajder”, “Gadhnjim mbi vdekjen”, “Shëmbja e idhujve”, “Një firmë e hekurt”, “Ngjyrat e moshës”, “Eja!”, “Në prag të jetës”, “Fraktura”; “Besa e kuqe”, “Në kufi të dy legjendave”, “Kur zbardhi një ditë”, “Fitues”, “Përse bie kjo daulle”. Nga dokumentarët rikujtojmë: “Çifti i lumtur”, “Festë e madhe”, “Festivali 7-te i fëmijëve”.
Ndonëse regjisor, Milkani ka kontribuar edhe si producent, skenarist dhe operator.
Me filmin “Gadhnjim mbi vdekjen”, ai debutonte për herë të parë si regjisor dhe do të spikaste për mënyrën e realizimit të një ngjarje të rëndësishme nga historia.
Filmi “Shtigje lufte” është filmi më i rëndësishëm për të, sepse do t’a bënte një emër të rëndësishëm të kinematografisë shqiptare.
Ndërsa në fillim të viteve 80-të, filmi bazuar në skenarin e Ruzhdi Pulahës, “Shoqja nga fshati” e më pas “Zonja nga qyteti” do ta bënte kinemanë e Milkanit më të dashurën e më të komunikueshme me shikuesin.
Në vitin 1987, Milkani, mori titullin “Artist i Popullit”. Në vitin 1997, ai u nderua me “Çmim të Veçantë” për të gjithë krijimtarinë e tij artistike në Euro-Festivalin e Saint-Étienne, Francë.
Në vitin 2019, Milkani u vlerësua me çmimin “Falënderim, Njeriut të Zotë”. Ky është një nga vlerësimet më të rëndësishme që i bëhen kryesisht personaliteteve çeke nëpër botë. Rasti i Piro Milkanit përbëu përjashtim.
Në vitin 2024, Milkani mori diplomën e tij të Fakultetit të Filmit pas 63 vitesh, event ky që u shoqërua me një ceremoni special në Çeki.
