E kemi thënë disa herë tashmë, që me ardhjen e verës shkëputemi nga ngjyrat e errëta, duke iu drejtuar nuancave të hapura, mbretëresha e së cilave vazhdon të mbetet e bardha. Koha e thatë, lëkura e bronztë – janë këto dy nga faktorët që favorizojnë veshjen e së bardhës. E kur vjen puna tek një fustan i së njejtës ngjyrë, shumica e femrave nuk ngopen duke mbushur garderobën me të tillë. Por, ja që një model të caktuar ende nuk e keni bërë tuajin, e jemi shumë të sigurt për këtë. I dizenjuar me një dantellë-flutur në njërin krahë, e një rrip të hollë në tjetrin, me dy gjatësi të dallueshme: një sipër gjurit, e tjetra poshtë tij (e stiluar me copë transparente), fustani në fjalë po çmend disa nga blogeret më të famshme në botë. Kjo veshje, e krijuar posaçërisht për ditët e nxehta të verës, mund të gjendet lehtësisht në shitje online, për vetëm £85. I kombinueshëm me çdo lloj sandale, të sheshtë apo me takë, një gjë është e sigurt: do të dukeni për mrekulli, në çastin e parë që e bëni tuajin. Në galeri do të gjeni tre kombinime nga blogeret, të cilat mund të jenë inspirimi juaj për verën e 2017.
