Kuvendi do të mblidhet sot në seancën plenare të radhës ku priten të miratohen disa akte normative lidhur me disa masa financiare që do të ndërmerren për shkak të situatës së krijuar nga pandemia e COVID-19.
Megjithatë duket se çështja e godinës së Teatrit Kombëtar do të jetë sërish në qendër të vëmendjes. Opozita parlamentare ka thirrur në interpelancë për këtë çështje kryeministrin Edi Rama. Në seancën e shkuar ai foli rreth 45 minuta për shembjen e godinës por opozita në parlament duket se ka pyetje të tjera për kryeministrin.
Në rendin e ditës në seancë plenare është për tu miratuar akti normativ për disa ndryshime në ligjin për tatimin mbi të ardhurat. Tatimpaguesëve me qarkullim vjetor mbi 14 milionë lekë përveç farmacive, bankave, kompanive të telekomunikacionit dhe bizneseve ushqimore, do tu shtyhet pagesa e këstit të tatimit mbi fitimin për tremujorin e dytë dhe të tretë për vitin 2020, dhe pagimi i kësteve do të vazhdojë në muajin tetor 2020, ndërsa të papaguarat paguhen në vitin 2021.
Bizneset që ushtrojnë aktivitet në fushën e turizmit, të përpunimit aktiv dhe të call center do tu shtyhet pagimi i kësteve për periudhën prill-dhjetor 2020, dhe do të paguhen në prill-dhjetor 2021.
Nga ana tjetër, bizneset e vogla pra ato me xhiro nën 14 milionë lekë nuk do ti paguajnë këstet e tatim-fitimit të vitit 2020. Në të njëjtin akt normativ është përfshirë edhe fakti që të përjashtohen nga pagesa e taksës së ndikimit mbi infrastrukturë i të gjitha investimet në kuadër të rindërtimit të vendit pas tërmetit të 26 nëntorit 2019.
Në seancën plenare do të jetë për diskutim edhe miratimi i aktit normativ për shtyrjen e fazës së parë të përgatitjes së programit buxhetor afatmesëm për shkak të pandemisë COVID-19.
Po ashtu parlamenti pritet të miratojë edhe projektligjin për marrjen e hua-së nga FMN në vlerën e 139.3 milionë SDR (monedhë e fortë, e drejta e tërheqjes speciale), ose rreth 174 milionë euro. /Opinion.al
