Presidenti Meta ka përshendetur vendimin e Kuvendit për t’u tërhequr nga votimi i paketës “anti-shpifje”. Kreu i shtetit shkruan se reflektimi i sotëm i shërbën një qëllimi më të madh të përbashkët që është mbrojtja e të drejtave kushtetuese të të gjithë qytetarëve shqiptarë, dhe njëkohësisht garantimit të standardeve demokratike dhe europiane.
“Përshëndes vendimin pozitiv dhe të përgjegjshëm të Kuvendit për t’u tërhequr nga votimi i paketës së ashtuquajtur “anti-shpifje”.
Reflektimi i sotëm i shërbën një qëllimi më të madh të përbashkët që është mbrojtja e të drejtave kushtetuese të të gjithë qytetarëve shqiptarë, dhe njëkohësisht garantimit të standardeve demokratike dhe europiane.”, -u shpreh Meta në një postim në Facebook.
Ditën e sotme Kuvendi ka tërhequr nga votimi projektligjin për median audiovizive, e njohur si paketa “anti-shpifje”, e cila është pranuar nga Komisioni i Venecias për shqyrtim.
Kreu i grupit parlamentar të PS-së, Taulant Balla, tha se do të pritet opinioni i Komisionit të Venecias, i cili ka nisur shqyrtimin me procedurë të përshpejtuar për këtë çështje.
“Sapo më ka ardhur komunikimi që Komisioni i Venecias ka pranuar ta shqyrtojë me procedurë të përshpejtuar këtë ligj më 20, 21 mars. Ndërkohë, gjatë muajit shkurt, përfaqësuesit e Venecias do të vijnë në Tiranë për të dialoguar me ne, me këdo.
I propozoj Kuvendit që votimi i dekretit për mediat audiovizive, diskutimi për të të shtyhet derisa Komisioni i Venecias të na sjellë raportin”, tha Taulant Balla./ Opinion.al
