Kuvendi ka rrëzuar sot kandidatin e dytë të propozuar nga Presidenti Ilir Meta për kreun e Kontrollit të Lartë të Shtetit.
Emri i Bahri Shaqirit u hodh poshtë me 77 vota. Në një seancë të mëparshme, maxhoranca rrëzoi dhe kandidaturën e Vitore Tushës, e cila u propozua e para nga Presidenti Meta për të drejtuar KLSH-në.
Bahri Shaqiri, ish-drejtor i shërbimit Informativ Shtetëror dhe aktualisht këshilltar i Presidentit për Çështjet e Sigurisë Kombëtare është propozuar nga Meta më 21 janar.
Pak ditë më parë edhe Komisioni i Ekonomisë e rrëzoi Shaqirin. Kreu i Komisionit të Ekonomisë, Arben Ahmetaj ka nënvizuar si mangësi kryesore mospërvojën e Bahri Shaqirit në fushën financiare dhe të auditit.
“Plotëson kushtin per arsimimin, ka disa kualifikime në fushën e sigurisë së marrëdhënieve ndërkombëtare. Nuk ka dënime, për shkak të funksioneve të larta që ka mbajtur, por nuk ka përvojë financiare, për organizimin dhe funksionimin e KLSH. Angazhimet janë të fokusuara në fushën e sigurisë, por jo në ato të parashikuara nga ligji për KLSH.
Eksperienca në legjislacionin financiar është e domosdoshme dhe e pazëvendësueshme me aftësi të tjera. Ai është larg specifikës financiare dhe auditimit, financiar, i performancës etj. Kështu që duke iu referuar të gjithë tagrit kushtetues të këtij komisioni, ky komision, i dërgon seancës për mosmiratimin e kandidaturës së tij”- tha Ahmetaj.
