Pas 9 orëve debat, pak pas mesnatës dhe pa praninë e deputetëve të opozitës, Kuvendi kaloi për votim disa projektligje dhe çështjen e dërgimit të mandatit të deputetit Vullnet Sinaj në Gjykatën Kushtetuese.
Me 73 vota pro të shumicës socialiste, Kuvendi miratoi ndryshimet në projektligjin për investimet e strategjike. Me ligjin zgjatet me 2 vite afati i përjashtimit nga tatimi mbi fitimin për hotelet luksoze më 4 dhe 5 yje si dhe shtyhet deri më 31 dhjetor 2026 afati për aplikimin për investime strategjike.
Ndërsa projektligji për një shtesë në ligjin “Për tatimin mbi të ardhurat”, u miratua me 68 vota pro, pasi tre socialistët Erjon Braçe, Pandeli Majko e Petro Koçi abstenuan. Ky ligj përjashton nga tatimi mbi të ardhurat e korporatave për një periudhë 10 -vjeçare, strukturat që përfitojnë statusin special deri në dhjetor 2026.
Kuvendi miratoi gjithashtu edhe ndryshimet e parashikuara në aktin normativ të qeverisë, që i hap rrugë bonusit të pranverës për pensionistët. Bonusi do të shpërndahet për pensionistët në muajin shkurt.
Gjithashtu kuvendi miratoi me 74 vota kërkesën e qeverisë për të marrë hua 77.5 milionë euro, nga BERZH për mbylljen e punimeve për ndërtimin e hekurudhës Tiranë-Durrës dhe për ndërtimin e linjës hekurudhore për në Aeroportin Ndërkombëtar të Tiranës. Pro kësaj kërkese veç socialistëve votoi edhe deputeti i PD-së, Bujar Leskaj.
Ndërsa u rrëzua kërkesa e PD-së për të dërguar në Gjykatë Kushtetuese mandatin e deputetit socialist Vullnet Sinaj. Për mosdërgimin e kësaj çështje në Kushtetuese votoi si partia socialiste edhe deputeti demokrat Bujar Leksaj, ndërsa 12 deputetë të PS-së abstenuan.
Shumica socialiste rrëzoi edhe kërkesën e PD-së për ngritjen e komisionit hetimor për projektin “Marina & Jahtet e Durrësit”dhe ndërtimin e portit të ri në Porto Romano.
Klan News
