Menjëherë pas miratimit të Pr. Rezolutës nga parlamenti me 76 vota pro, 2 kundër dhe asnjë abstenim, ka ardhur dhe reagimi i parë nga opozita, e cila nuk mori mori pjesë në votim.
Kundër projektrezolutës votoi Agron Shehaj dhe Dashnor Sula.
Deputeti demokrat Dashnor Sula, pas votimit kundër për këtë projektrezolut, ka kërkuar fjalën në Kuvend.
Ai shprehet se ky është një skenar ogurzi të pengimit të drejtësisë së pavarur. Sipas deputetit, kjo rezolutë ka si qëllim që të mbajë nën kontroll SPAK-un dhe GJKKO-në.
Dashnor Sula: Shpreh keqardhjen që ditën e sotme, ky parlament ka miratuar një rezolutë duke i hapur rrugën një skenari ogurzi të pengimit të drejtësisë së pavarur që ju pretendoni se do ta mbroni, pikërisht SPAK-ut dhe GJKKO-së. Kjo rezolutë nuk është asgjë tjetër veçse ngritja e një Komisioni të Posaçëm, i cili do të bëjë të mundur të thërrisni dhe t’i vini shkopinjtë nën rrota SPAK-ut, drejtuesit të SPAK-ut dhe institucioneve të tjera të drejtësisë së pavarur që t’i mbani nën kontroll dhe nën fre.
Sipas Sulajt, komisioni i posaçëm që do të ngrihet në sajë të kësaj rezolute të miratuar ditën e sotme ka si qëllim që të pengojë hetimet e SPAK.
Dashnor Sula: Arsyeja është e thjeshtë dhe e vetme sepse SPAK ka depërtuar aq larg duke pasur parasysh se përpara SPAK-ut, nën hetim janë figurat më të larta të kësaj mazhorance, kryetarë bashkie, ish-zëvendëskryeminstra e deputetë. Komisioni që do të ngrihet nga ana juaj do të bëjë të mundur drejtuesin e SPAK dhe do ta thërrisni atje përpara dhe pikërisht për të mbrojtur kryetarin e Bashkisë së Tiranës keni ngritur këtë komision të posaçëm, të cilin do ta pengojë hetimin, por nuk keni për ta ndalur dhe për këtë jam i bindur.
