Ashtu siç ishte paralajmëruar edhe nga kreu i grupit parlamentar socialist, Taulant Balla, vendimi i Gjykatë së Tiranës për çështjen e CEZ është apeluar nga Kuvendi.
Në datën 21 janar, Gjykata vendosi të pushojë çështjen e privatizimit të OSSH nga CEZ me argumentin se nuk kishte elementë të veprave penale për ish-zyrtarët e akuzuar. Sot njoftohet se Kuvendi e ka çuar çështjen në Gjykatën e Apelit.
“Siç kishim paralajmëruar, i njëjti gjyqtar “KÇK” i cili në mënyrë skandaloze rrëzoi akuzat për Lulzim Bashën “675 mijë dollarë”, sot mori një vendim haptazi në kundërshtim me ligjin në lidhje me dosjen “CEZ-418 milionë Euro”, ku i akuzuari kryesor është Sali Berisha në bashkëpunim me persona të tjerë. Ky vendim i paligjshëm do të ankimohet menjëherë dhe paralelisht gjetjet e Komisionit Hetimor do t’i dërgohen javën e ardhshme Prokurorisë Kundër Korrupsionit dhe Krimit të Organizuar (SPAK).”, shkruajti Taulant Balla në Facebook ditën e vendimit të Gjykatës së Tiranës.
Hetimet për procedurën e privatizimit të OSSH nga cekët e CEZ në 2007 zgjatën 3 vite. Për këtë çështje u ngrit edhe një Komision Hetimor Parlamentar i drejtuar nga Taulant Balla, i cili arriti në konkluzionin se nga procedura e privatizimit të OSSH, shtetit i ishte shkaktuar një dëm prej 414 milionë eurosh.
Personat e akuzuar në lidhje me këtë çështje janë ish-kryeministri Sali Berisha, djali i tij Shkëlzen Berisha, ish-ministri i Ekonomisë Genc Ruli, biznesmeni Nue Kalaj, ish-ministri i Financave, Ridvan Bode, të gjithë anëtarët e Komisionit të Vlerësimit të Ofertave në atë kohë, ë gjithë anëtarët e Komisionit të Negocimit të Marrëveshjes me CEZ, dy ish-zv/ministrat e energjetikës dhe transportit, Florion Mima dhe Eno Bozdo, Ledina Mandia, ish Avokate e Shtetit dhe dy ish-kryetarët e ERE, Bujar Nepravishta dhe Sokol Ramadani. /Opinion.al
