Konferenca e Kryetarëve miratoi mocionin me debat të kërkuar nga Partia Socialiste, në lidhje vendimin e presidentit Meta për tërheqjen e dekretit për zgjedhjet lokale të 30 qershorit.
Mocioni me debat i kërkuar nga socialistët do të përfundojë me miratimin e një rezolute për shkarkimin e presidentit Ilir Meta.
Gjatë seancës së të enjtes pritet të debatohet rreth 5 orë për mocionin. Mazhoranca e cilësoi dje vendimin e presidentit Meta një akt të pavlefshëm në tejkalim të kompetencave.
Por, çfarë parashikon rregullorja e Kuvendit për shkakrimin e Presidentit ?
Në nenin 112 të saj, detajon një procedurë të gjatë, që duhet ndjekur hap pas hapi. Gjithçka nis me paraqitjen e kërkesës me shkrim të 1/4 së deputetëve, drejtuar kryetarit të Kuvendit, bashkë me motivimin e shkeljeve të pretenduara të Presidentit.
Pas i merret propozimi, kreu i Kuvendit duhet të vërë në dijeni parlamentin dhe Presidentin. Pas procedurës së ndjekur nga kryeparlamentari, kërkesa i paraqitet Komisionit të Ligjeve që brenda 15 ditëve duhet t’i paraqesë Kuvendit raportin bashkë me mendimin nëse duhet ngritur një komision hetimor apo jo.
Ndërsa, Kuvendi brenda 7 ditësh duhet të zhvillojë seancë me debat mbi këtë raport. Më pas, nëse propozimi pranohet në Kuvend, duhet që brenda dy ditëve të ngrihet një komision hetimor i cili do të mbledhë të dhëna për akuzat ndaj presidentit. Komisioni ka në dispozicion tre javë kohë për të kryer procedurat e nevojshme.
Në përfundim të hetimit, për të cilin Rregullorja nuk parashikon një afat maksimal kohëzgjatjeje, komisioni hetimor duhet t’i paraqesë Kuvendit në mënyrë të arsyetuar nëse ekzistojnë shkaqet për shkarkimin e Presidentit të Republikës.
Pasi janë kryer procedurat, komisioni hetimor harton një raport dhe i dorëzohet Kuvendit, i cili brenda 20 ditëve duhet të bëjë shqyrtimin e tij. Gjithashtu, presidenti ka të drejtë që të mbajë fjalën e tij në lidhje me çështjen dhe të dëgjohet nga të gjitha palët.
Pas këtyre proceduarave, Kuvendi vendos për shkarkimin e Presidentit të Republikës me jo më pak se dy të tretat e të gjithë anëtarëve të tij, pra 94 vota dhe me votim të fshehtë.
Ndërkohë, pasi është kaluar procedura e votimit dhe janë marrë votat e nevojshme , vendimi Kuvendit i dërgohet, Gjykatës Kushtetuese, e cila vendos përfundimisht për shkarkimin ose jo të Presidenti/ Opinion.al
