Në nisje të seancës plenare, Gazment Bardhi deputeti i PD iu drejtua kryetares së Kuvendit Elisa Spiropali, duke thënë se kjo e fundit shtyu punimet e Kuvendit, për “të ngrënë drekë në Greqi”. Sipas tij, kryeparlamentarja nuk ishte në Ukrainë të enjten.
“Seanca plenare do duhej të ishte mbledhur të enjten, sipas kalendarit të punimeve të Kuvendit. Të enjten nuk ishit në Ukrainë, por po haje drekë në Greqi. Të mbyllësh kuvendin për ta trajtuar si shtëpinë personale, është një arrogancë që kalon kufijtë e sjelljes tuaj të përditshme“, tha Bardhi.
Më tej, Bardhi theksoi se kur na ndajnë pak kohë nga mbyllja e kësaj legjislature, nismat e deputetëve janë lënë “stok”.
“Edhe pse jemi një muaj nga mbyllja e kësaj legjislature, ju mbani të kyçura 60 nisma të deputetëve të Kuvendit të Shqipërisë. Ju trajtoni me prioritet çdo nismë që vjen nga Këshilli i Ministrave, ndërkohë nuk trajtoni asnjë projektligj të propozuar nga deputetët, kryesisht nga deputetët e opozitës. Janë nisma që flejnë në sirtarin tuaj. Jemi tre javë nga mbyllja e Kuvendit dhe ne nuke dimë akoma se kur do të shqyrtohen në seancë plenare. Uroj t’ju ketë shijuar dreka në Athinë dhe t’ja ketë vlejtur!”, shtoi opozitari.
Ndërkohë Spiropali iu përgjigj duke i thënë se arsyeja pse seanca plenare u shty, nuk ishte pjesëmarrja e saj në samitin e Odesës, por angazhimet e një pjese të mirë të deputetëve.
“Më vjen mirë që më ndiqni hap pas hapi”, i tha me ironi ajo Bardhit.
