Drejtësia shqiptare i ka dhënë “drite jeshile” ekstradimit në Serbi të një ishushtari të Ushtrisë Çlirimtare të Kosovës. Përmes një vendimi të shpallur në 22 maj 2017 Gjykata Kushtetuese la të pandryshuar një vendim të Gjykatës së Apelit Shkodër dhe të Gjykatës së Lartë, që lejonin ekstradimin e Skënder Hazirajt.
Ky i fundit kërkohej nga pala serbe për llogari të një dënimi me 6 vjet burg të dhënë në mungesë ndaj tij nga Gjykata e Lartë e Beogradit për akuzat e “kalimit të paligjshëm të kufirit shtetëror” dhe “trafikimit të njerëzve”. Kërkuesi Haziraj kërkonte shfuqizimin si antikushtetuese të dy vendimeve për ekstradimin e tij në Serbi, me pretendimin se do të diskriminohej në këtë vend për shkak të shtetësisë dhe pjesëmarrjes së tij në UÇK. Pasi shqyrti çështjen mbi bazën e dokumenteve, Kushtetuesja, ka vlerësuar se vendimmarrjet e Apelit Shkodër dhe Gjykatës së Lartë për rastin e Hazirajt ishin në zbatim të ligjit. Shtetasi kosovar, Skënder Haziraj, është arrestuar në Kukës më 13 qershor 2014, për shkak se rezultonte i dënuar me burg nga drejtësia serbe për dy vepra penale të konsumuara në atë vend gjatë periudhës prillnëntor 2006. Për llogari të këtij procedimi penal, pala serbe ka paraqitur një kërkesë për esktradimin e tij. Kjo kërkesë është shqyrtuar në Gjykatën e Kukësit, e cila në tetor 2014 ka vendosur rrëzimin e saj. Vendimi është ndryshuar më vonë në Apelin e Shkodrës, i cili pranoi ekstradimin. Në tetor 2015 Gjykata e Lartë la në fuqi vendimin e Apelit Shkodër. Gjatë shqyrtimit të këtyre kërkesave është provuar se.
“NUK DISKRIMINOHET”
Gjykata e Lartë shprehej në vendimin e arsyetuar të saj në lidhje me këtë rast se Skënder Haziraj nuk është deklaruar fajtor dhe dënuar nga drejtësia serbe për vepra penale me karakter politik. Po sipas Gjykatës së Lartë, ai nuk kërkohet për qëllime politike, pasi është proceduar dhe dënuar për veprat penale të “kalimit të paligjshëm të kufirit shtetëror” dhe “trafikimit të njerëzve”, referuar neneve përkatëse të Kodit Penal serb. Ai ka hyrë disa herë në territorin e shtetit serb, edhe pas luftës së Kosovës, ku ka kryer veprat penale për të cilat ai është dënuar. “Po kështu, nuk ka arsye të mendohet se personi që kërkohet të ekstradohet do t’i nënshtrohet diskriminimeve për shkak të racës, fesë, gjinisë, shtetësisë, gjuhës, bindjeve politike, gjendjes personale a shoqërore ose dënimeve a trajtimeve të egra, çnjerëzore a poshtëruese ose veprimeve që përbëjnë shkelje të një të drejte themelore të njeriut, të cilat sipas germës ‘b’ të nenit 491 të Kodit të Procedurës Penale përbëjnë shkak për mospranimin e kërkesës për ekstradim. Vetëm qenia e të gjykuarit ish luftëtar i UÇKsë nuk përbën ‘apriori’ shkak për refuzimin e ekstradimit”, arsyetonte Gjykata e Lartë.
REFUZIMI
“Shtetësia kosovare e Skënder Hazirajt, përforcohet si shkak rëndimi pozite të tij në rast ekstradimi edhe me të kaluarën e tij patriotike e kontributin luftarak kundër forcave të armatosura serbe, siç provon akti i nënshkruar nga Komiteti përkatës i Veteranëve të Luftës së Republikës së Kosovës. Mbi këtë arsyetim, ekskluzivisht kjo gjykatë vendos të refuzojë ekstradimin e një shtetasi Kosovar drejt Republikës së Serbisë”, thuhej në arsyetimin e vendimit të Gjykatës së Kukësit, e cila refuzoi ekstradimin e Hazirajt.
Avokati: Ai ka luftuar me armë
Avokati i Skëndër Hazirajt ka kërkuar shfuqizimin si të papajtueshëm me Kushtetutën të vendimit të Apelit Shkodër dhe atij të Gjykatës së Lartë. Sipas avokatit, klienti i tij nuk mund të trajtohej, siç përcaktohej në vendimin e Gjykatës së Lartë të Beogradit, pasi Republika e Shqipërisë e ka njohur shtetin e Kosovës. Po sipas avokatit, në dokumentacionin që shoqëron kërkesën për ekstradim ka mangësi në identifikimin e Hazirajt, pasi dokumenti i dërguar është nxjerrë nga qarkullimi dhe nuk përdoret më për identifikim. “Personi që kërkohet të ekstradohet ka qenë anëtar i UÇK dhe ka bërë furnizimin me armë të UÇK në Zonën Operative Shalë, ai ka luftuar me armë në vitet 19981999 kundër ushtrisë serbe. Këtu kemi të bëjmë me arsye politike për të cilat duhet të refuzohet ekstradimi u kemi të bëjmë me arsye politike për të cilat duhet të refuzohet ekstradimi pasi duket qartë që ky shtetas do të diskriminohet po u ekstradua për shkak të shtetësisë së tij kosovare dhe veprimtarisë patriotike si anëtar i UÇK”, është argumentuar nga mbrojtësi. /Panorama
