Kush proteston apo organizon mitingje nuk do të ketë më asnjë detyrimin të marrë leje nga institucionet ligjzbatuese por thjesht duhet t’i njoftojë ato.
Ky është vendimi, që është marrë ditën e sotme nga Gjykata Kushtetuese e cila ka pranuar kërkesën e Gjykatës Apelit Shkodër dhe ka shfuqizuar nenin 262 të Kodit Penal për protestat.
Bëhet me dije se Gjykata ka kërkuar që neni përkatës të korrigjohet brenda 6 muajsh. Kujtojmë se tubimet e paligjshme quheshin kundravajtje penale dhe dënohej me gjobë deri në 2 vite burg.
Ndërkohë që një ndryshim i tillë në ligj ka ardhur si pasojë e Gjykatës së Apelit Shkodër, e cila i kërkoi Gjykatës Kushtetuese në janar të vitit të kaluar të shpallë antikushtetuese ndryshimet e kodit penal që konsiderojnë vepër penale protestat që organizohen pa leje. Ndryshimi i bërë në vitin 2017 Nenit 262 në kodin penal kërkon leje për organizim të protestave në të kundërtën dënohesh me gjobë ose me burg deri në një vit.
“Organizimi i grumbullimeve dhe i manifestimeve të personave në sheshe dhe vende të kalimit publik, pa marrë më parë lejen nga organi kompetent sipas dispozitave të veçanta apo kur nga organizatorët shkelen kushtet e parashtruara në kërkesën për dhënie të lejes, përbën kundërvajtje penale dhe dënohet me gjobë ose me burgim gjer në një vit.”
Vendimi i Gjykatës Kushtetuese
Në përfundim të shqyrtimit Gjykata Kushtetuese
VENDOSI:
1. Pranimin e kërkesës.
2. Shfuqizimin e shprehjes “pa marrë më parë lejen nga organi kompetent sipas dispozitave të veçanta” në paragrafin e parë të nenit 262 të Kodit Penal.
3. Detyrimin e Kuvendit të plotësojë normën ligjore nga data e shpalljes së vendimit të Gjykatës Kushtetuese deri në hyrjen në fuqi të tij.
4. Ky vendim është përfundimtar dhe hyn në fuqi 6 muaj pas botimit në Fletoren Zyrtare
