Këshilli i Emërimeve në Drejtësi ditën e nesërme do t’i dërgojë presidentit të Republikës, Ilir Meta renditjen me dy emrat kandidatë për anëtarë të Gjykatës Kushtetuese.
Sipas njoftimit, mbledhja e KED do të zhvillohet në orën 14:00, ku pas intervistave me dy kandidatët, Aleksandër Toma dhe Përparim Kalo, do të bëhet edhe vlerësimi, pikëzimi e renditja e tyre. E më pas nga dy kandidaturat e propozuara presidenti do të zgjedhë anëtarin e gjashtë të këtij institucioni.
Kujtojmë që momentalisht Gjykata Kushtetuese ka 5 anëtarë, nga 9 që duhet të ketë normalisht. Për të qenë funksionale, kjo gjykatë duhet të ketë së paku 6 gjyqtarë në detyrë.
Për këtë pozicion kishte kandiduar më herët edhe Altin Binaj, por ky i fundit u zgjodh pak ditë më parë në detyrën e gjyqtarit të Gjykatës Kushtetuese, pasi kishte kandiduar edhe për vakancën e shpallur nga Kuvendi./Opinion.al
