Një tjetër pyetje që ngrihet për datën 30 qershor është se kush do të votojë? Sipas Edi Palokës, nënkryetari i Partisë Demokratike, në 30 qershor nuk votojnë qytetarët. Paloka thekson se të vetmit që mund të votojnë mund të jetë administrata e kërcënuar.
“Përveç administratës, e cila po të detyrohet, nën kërcënim, të shkojë të marrë pjesë në këtë farsë të fëlliqur, asnjë tjetër nuk shkon. Madje, shumë socialist kanë deklaruar edhe publikisht”. Nga ana tjetër në rrjetet sociale nga PS, janë parë të shpërndarë disa formularë që bëjnë fjalë për një të ashtuquajtur sistem patronazhi.
Në formular ka të detajuar elementë të posaçëm si për emrin e personit të patronazhit, tek emrat e votuesve, me qendër votimi e deri te vendi ku do të takohen për të “shmangur deklarimet fiktive”.
Poshtë formularit ka saktësime të tjera, të tipit “patronazhuesi që plotëson formularin garanton dhe mban përgjegjësi që personat e listuar, pra votuesit, do të paraqiten për të votuar më 30 qershor. Patronazhues mund të jenë që nga drejtues të strukturave të PS, drejtues institucionesh, persona influentë në zona, apo persona që quhen të spikatur”.
Në këtë mënyrë patronazhuesi del garant që ata do votojnë për PS, pasi u ka marrë më parë emrat dhe firmat dhe bën edhe shoqërimin e tyre në votim. Nga PS as nuk e mohojnë, as nuk e mohojnë ekzistencën e këtij formulari. / Opinion.al
