Ditën e sotme u gjetën të vrarë me armë zjarri në Maliq dy vëllezërit Andrea dhe Martin Olldashi. Dy vëllezërit nga Pogradeci ishin larguar nga shtëpia që prej datës 7 dhjetor. Një ditë më parë nëna e tyre kishte bërë denoncim në polici për zhdukjen e djemve.
Ata ishin me precedentë të mëparshëm penalë në fushën e vendosjes së gjobave ndaj biznesenëve dhe janë akuzuar për disa vjedhje të ndodhura në qytet.
Policia po punon për zbardhjen e plotë të rrethanave të ngjarjes si dhe identifikimin dhe kapjen e autorëve. Po ndiqet itinerari i rrugës që i ka çuar ata nga Pogradeci në Maliq për të shkuar në zbardhjen e ngjarjes.
Njoftimi i Policisë
Më datë 10.12.2020, rreth orës 11:50, në fshatin Zvirinë, në afërsi të vendit të quajtur “Kisha e vogël”, janë gjetur të pajetë, trupat e vëllezërve A. O., 33 vjeç dhe M. O., 31 vjeç, banues në Pogradec, të cilët dyshohet të kenë humbur jetën si pasojë e përdorimit të armës së zjarrit. Këta shtetas, ishin larguar nga banesa e tyre që prej mbrëmjes së datës 07.12.2020.
Në lidhje me këtë ngjarje menjëherë është ngritur një grup i posaçëm hetimor, me ekspertët më të mirë të Policisë Kriminale të strukturave hetimore në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë.
Forcat Operacionale të DVP Korçë, në bashkëpunim me Komisariatin e Policisë Maliq, janë duke krehur zonën, gjithashtu janë shoqëruar në Polici disa persona për t’u marrë në pyetje nëse kanë dijeni apo jo në lidhje me këtë ngjarje.
Po ndiqet itinerari i lëvizjeve dhe po kryhen një sërë veprimesh hetimore për sqarimin e plotë të rrethanave të kësaj ngjarjeje si edhe kapjen e vënien përpara përgjegjësisë ligjore të autorëve./ Opinion.al
