Elis Guri, mundësi i arrestuar nga policia gjatë operacionit të një dite më parë, nuk është sportisti i vetëm nga Shkodra që përballet me problemet e drejtësisë.
Renato Malota
Fillimisht në marsin e këtij vitit, ishte emri i qendërmbrojtësit të Vllaznisë, Renato Malota që u publikua në një listë të gjatë emrash të akuzuar për tjetërsim pronash në bregdetin e Lezhës. Pas arrestimit të kryebashkiakut të Lezhës dhe publikimit të listës me personat e shpallur në kërkim e ku gjendej edhe emri i tij, vetë Malota u shpreh në media se nuk kishte patur lidhje me këtë ngjarje. Pak ditë më pas, Malota u paraqit vetë në Policinë e Lezhës për të sqaruar pozicionin e tij lidhur me akuzat.
Armir Grima
Ndërkohë, trajneri i Vllaznisë për femrat, njëherësh ish-portieri i njohur Armir Grima përfundoi në pranga më 24 shtator të këtij viti, pas kryerjes së operacionit “Oaz” të zhvilluar nga Policia e Shtetit, prokuroria, shërbimet partnere dhe Shërbimi Informativ Kombëtar.
Grima është një nga portierët më me emër në futbollin shqiptar. Ai ka qenë portier i ekipit të futbollit të Vllaznisë në vitet 1998-2001, kohë kur ky ekip është shpallur kampion.
Ish-portieri legjendar i Vllaznisë, ish kapiten dhe trajner i ekipit, është arrestuar si pjesë e grupit kriminal të Bajrajve, ndërsa akuzohet për trukime ndeshjesh.
Elis Guri
Emri i Elis Gurit u bë publik ditën e sotme, mes emrave të 27 personave të arrestuar gjatë operacionit “VOL-VO 4” është edhe Elis Guri. I riu nga Shkodra është një emër i njohur në botën e sportit të mundjes ku ka kulmuar madje me medaljen e bronzit në kampionatin Evropian.
Por pas operacionit të fundit të policisë, i shtrirë në 12 qarqe të vendit rezultoi i arrestuar edhe sportisti i njohur, i cili akuzohet për veprat penale të ”Prodhimit dhe shitjes së narkotikëve” si dhe ”Trafikim i narkotikëve”. Pas vitit 2008, Elis Guri përfaqëson shtetin bullgar në mundje. /Opinion.al
