Ka qenë nipi i tij, Rigels Balili, personi që negocioi me Ardi Veliun për të dorëzuar një nga emrat më të lakuar të botës së krimit, Klement Balilin në duart e policisë dhe duke përmbyllur pas më shumë se dy vitesh sagën e gjatë të arratisjes, për t’iu fshehur drejtësisë.
Prej gati një viti policia shqiptare, përveç veprimeve operative, kontrolleve në banesa apo mbajtjes nën mbikqyrje të familjarëve kishte nisur bisedimet dhe me familjarët, duke nxitur dorëzimin e Balilit pranë autoriteteve.
Kjo detyrë është marrë nga nipi i Klement Balilit, Rigelsi, i cili ka negoiciuar për dorëzimin e tij pranë autoriteteve policore.
Lajmi është bërë me dije gjatë një interviste për “OraNews”, ku Rigels Balili është shprehur se negociatat kanë nisur që në momentin kur janë njoftuar se është plotësuar dosja dhe është gati për t’u dorëzuar në gjyq.
Ai tha se ditën e sotme u bë e mundur edhe dorëzimi i tij në Drejtorinë e Policisë. Sipas tij, Balili nuk është arrestuar, por është vetëdorëzuar.
Ai deklaroi se ka qenë ky personi që ka shkuar në zyrën e drejtorit të policisë dhe ka kryer negociatën për dorëzimin e Klement Balilit, apo i njohur ndryshe nga mediat si “Eskobari i Ballkanit”.
Nga ana tjetër, është mësuar se bisedimet mes palëve janë drejtuar nga kreu i Policisë, Ardi Veliu. Eshtë pikërisht ky i fundit, personi të cilit Balili iu dorëzua sot rreth orës 9.45 minuta në një zonë mes Sarandës dhe Finiqit.
Ai ka qenë i shoqëruar nga dy familjarë të tij, personat që kanë bërë dhe ndërmjetësimin për dorëzimin. Ka qenë po Drejtori i Policisë Veliu, ai i cili e ka sjellë Balilin në Tiranë.
Dorëzimi i tij vjen pikërisht në kohën kur dhe Prokuroria për Krimet e Rënda sapo ka mbyllur hetimet dhe ka dërguar dosjen për gjykim. Ai akuzohet për “trafikim të lëndëve narkotike”, i kryer në bashkëpunim, në formën e grupit të strukturuar kriminal, “pjesëmarrje në grupin e strukturuar kriminal”, “Refuzim për deklarim, mosdeklarim, fshehje ose deklarim i rremë i pasurive”, si dhe për “pastrim parash”.
Emri i Balilit doli gjatë një hetimi, i cili u finalizua në fillim të muajit maj të vitit 2016, me një operacion të ndërmarrë nga autoritetet greke në bashkëpunim me DEA-n amerikane, ku u sekuestruan mbi 670 kilogram marijuhanë në ishullin Zakintos në Greqinë lindore.
Në këtë operacion u përfshi dhe policia shqiptare si dhe autoritetet e disa vendeve të Bashkimit Europian, ku dyshohet të ketë shtrirë rrjetin e trafikut organizata, një prej krerëve të së cilës dyshohet të jetë Klement Balili, i përkufizuar nga mediat greke si “Eskobari i Ballkanit”.
Një numër i madh anëtarësh dhe drejtuesish të organizatës u arrestuan në Greqi dhe në disa vende të tjera europiane, ndërkohë që Balili vetë mundi të shpëtojë.
Fillimisht ai u shfaq publikisht në Sarandë, duke mohuar akuzat, ndërsa më pas u zhduk pa lënë gjurmë. Dosja për Balilin nga Greqia mbërriti në fund të vitit të shkuar, dhe policia organizoi gjatë muajit dhjetor disa operacione për kapjen e tij, të cilat rezultuan të pasuksesshme./Opinion.al/
