Aleksandër Ndoka i ekzekutuar me breshëri automatiku në orët e para të mëngjesit të ditës së sotme, pranë banesës së tij nga persona ende të paidentifikuar ishte këshilltar në Këshillin Bashkiak të Lezhës.
Ndoka është baba i katër fëmijëve, dy vajzave dhe dy djemve dhe që nga viti 2015 ishte zgjedhur këshilltar në Këshillin Bashkiak të Lezhës, përfaqësues i “Partia Rruga e Lirisë”.
Ai rezulton një person pa precedentë penalë, të paktën kështu thuhet në formularin e dekriminalizimit, që ai ka dorëzuar në KQZ për të vijuar detyrën si Këshilltar Bashkiak.
Mësohet se Ndoka ka dhe një lokal pranë banesës ku jetonte me familjen.
Policia ende nuk ka detaje rreth autorëve, ndërkohë që forca të shumta policore ndodhen në vendin e ngjarjes dhe kanë nisur hetimet.
INFORMACIONI I POLICISE LEZHE
Me datë 09.12.2017, rreth orës 04:25, Salla Operative është njoftuar se në Lagjen “Nënë Tereza” ka ndodhur një vrasje me armë zjarri.
Shërbimet e Policisë kanë shkuar menjëherë në Lagjen “Nënë Tereza”, ku kanë konstatuar se në mjetin tip “Mitsubish”, me targa AA 382 SE, ndodhej trupi i pajetë i shtetasit A.N.,48 vjeç, banues në lagjen “Nënë Tereza” Lezhë, i vrare me arme zjarri nga persona akoma të paidentifikuar.
Grupi hetimor nën drejtimin e Prokurorit ndodhet në vendin e ngjarjes ku po vazhdojnë hetimet për zbardhjen e plotë të ngjarjes.
Janë ngritur pika kontrolli si dhe po bëhet krehja e zonës me qëllim kapjen e autorëve.
Në mbështetje të veprimeve që po kryhen nga D.V.P. Lezhë për kapjen e autorëve, janë dërguar edhe dy grupe të F.N.SH. Shkodër .
