Emri i tij filloi të lakohej jashtë mase në vitin 2016, pas publikimit të librit “Hide mbi Kalldrëm”. Tom Kuka hyri në rrethin e autorëve vetëm dy vite më parë, dhe menjëherë ngjalli kureshtje. Kjo jo vetëm për stilin e tij interesant në të shkruar, fjalorin e pasur dhe karakteristikave të tjera, por mbi të gjitha për faktin që Tom Kuka është një pseudonim. Menjëherë pasi botuesja e zbuloi këtë fakt, të gjithë filluan të pyesin: “Kush është Tom Kuka?”
Në librin e tij të parë, Tom Kuka përshkruan Tironën e viteve ’30. Autori nuk ka kursyer as dialektin dhe tipare të tjera të qytetit të atyre viteve. Në parathënien e librit, Tom Kuka i lë të gjithëve të nënkuptojnë që është personazh i njohur publik.
“Duke qenë shpesh në sy të publikut, mendoj se mbi personazhin që unë përfaqësoj janë ngritur opinione e paragjykime. Kjo është e kuptueshme, njerëzore. Ndaj edhe vendosa të paraqitem me një emër tjetër, sepse dëshiroj që lexuesi të lexojë letërsinë e këtij libri, jo autorin e tij,”- shkruan autori.
Së fundmi Tom Kuka ka botuar një tjetër libër të titulluar “Gurët e Vetmisë”. Libri, të cilin e sjellin Botimet Pegi, flet për masakrën e Çamërisë. Është një rrëfenjë epike për çka ndodhi një shekull më parë në tokat shqiptare.
Sonte, Tom Kuka është i ftuar në emisionin ‘Opinion’. Autori do të flasë për dy librat e tij në një intervistë të shkurtër me gazetarin Blendi Fevziu, dhe gjithashtu do të zbulojë identitetin e tij./Opinon.al
