Të tjera detaje mësohen për laboratorin e drogës që u zbulua në Skrapar. Policia tha se droga përpunohej në një fabrikë që prodhonte çanta dhe ndodhej në një zonë të thellë ndërmjet Skraparit dhe Beratit, pranë HEC-it të Vlushës.
Në pranga kanë rënë Muhamet Kadiu 49 vjeç dhe Edlira Lame 42 vjeçe të dy banues në Skrapar. Kjo e fundit është administratore e kompanisë fasone ku përpunohej droga.
Ajo e kishte kthyer fabrikën në laborator droge. Aty u gjetën disa ton kanabis e paketuar dhe 2 mijë fidanë në boçe gati për t’u mbjellë.
Prokuroria tha se ky ishte një nga laboratorët më të sofistikuar dhe modern të përpunimit të kanabisit. Ai ishte i pajisur me mjetet më moderne sa i përket ndriçimit, ngrohjes dhe vaditjes së bimës narkotike. 2 mijë rrënjë janë gjetur të mbjella në vazo të mëdha.
Bashkë me to u gjetën sasi të konsiderueshme kanabisi të tharë, e cila përllogaritet në disa ton.
Flitet për 6 ton drogë, por kjo shifër nuk është zyrtare.
Zbulimi i laboratorit është vazhdim i operacionit të dy javëve më parë në fshatin Lapan të Beratit, ku 1,2 ton kanabis e futur në disa thasë u gje në një magazinë.
