25-veçarja Majlinda Kelmendi nuk i ka mbajtur dot emocionet mbrëmjen e djeshme, kur në qafë i është vendosur medlaja e artë e lojërave olimpike të Rios. Xhudistja kosovare, garonte për herë të parë nën flamurin e Kosovës, që me sa duket i ka sjellë fat, duke krenuar në fakt gjithë shqiptarinë, në një kohë kur delegacioni shqiptar në këtë eveniment ka shfaqur probleme organizimi dhe mosmarrëveshje.
Por cila është vajza pejane, mbretëreshë e xhudos?
E lindur në 9 Maj të vitit 1991, ajo mban sot tituj botëror dhe europian. Në vitin 2013, Majlinda u rendit e para në klasifikimin ndërkombëtar të Federatës Ndërkombëtare të Xhudos për peshën 52 kg. Një vit më pas, u konsiderua xhudistja më e mirë në të gjitha kategoritë, nga presidenti i federatës së xhudos Marius Vizer.
Në 24 Dhjetor të vitit 2014, ajo u dekorua nga Presidentja Kosovare Atifete Jahjaga me “Medaljen Presidenciale të Meritës” .
Në 7 gusht të vitit 2016 ajo u bë kosovarja e parë që fitoi një medalje ari në Lojërat Olimpike Verore dhe femra e parë në gjithë shqiptarinë që merrte një medalje të tillë. Në vitin 2012, ajo përfaqësoi Shqipërinë në Lojërat Olimpike të Londrës, por nuk arriti të merrte medalje. / opinion.al
