Një person i ndaluar si i dyshuar po mbahet në qeli prej disa ditës për ngjarjen e Rinasit, ku u grabit makina me 3.2 milionë euro e BKT-së. Ai është Fation Xhyli nga Lushnja dhe policia dyshon se ka bashkëpunuar me grabitësit.
Lajmi është berë i ditur nga avokati, i cili është kontaktuar nga familja. Prej momentit të ndalimit ai nuk ka mundur ta kontaktojë klientin e tij. Mësohet se i është bërë e ditur se do ta takojë përpara marrjes së masës së sigurisë e cila do jetë një seancë sekrete në gjykatë për vetë rrethanat e çështjes dhe rëndësinë e hetimit.
Policia e Tiranës e shoqëroi Fation Xhylin, 3 ditë më parë bashkë me të vëllanë, por dyshimet më të forta bien mbi të, kështu që të gjithë të dyshuarit e tjerë janë liruar.
Nga verifikimet që janë kryer nëpërmjet antenave të telefonisë celulare, ka rezultuar se të dy vëllezërit kanë qenë të pranishëm 30 minuta para dhe pas grabitjes, në zonën përreth Qafës së Kasharit dhe Rinasit, ndërsa njëri prej tyre është punonjës i një policie private.
