Viti “i mbrapshtë” 1997 solli në Shqipëri lulëzimin e bandave të ndryshme kriminale. Ato drejtoheshin nga persona të cilët jo rrallë herë ishin vrasës gjakftohtë.
Një nga ata është dhe Lulzim Caka, i cili fitoi nofkën “i tmerrshmi” i Beratit për ngjarjet e rënda në të cilat është përfshirë gjatë viteve 1997-2000. Ai ishte kthyer në një problem serioz për të gjithë udhëtarët e akseve Berat-Fier dhe Berat-Lushnjë. Por ajo që do ta bënte edhe më të frikshëm reputacionin e tij të një njeriu të dhunshëm ishte konflikti me Fatmir Eminin, ose i njohur ndryshe si Mile Çami, të cilit Lul Caka i vrau të vëllain.
Kjo ngjarje do të pasohej nga një sërë episodesh të dhunshme në rrethin e Fierit. Një ndër të cilat është sulmi ndaj postbllokut të policisë duke tentuar të vrasë dy komisarët Gani Malushi dhe Ilir Ngresin. Për këtë ngjarje Caka do të arrestohej dhe do të burgosej por dy komisarët u vranë më vonë njëri nga miku i Lul Cakës, Kastriot Jaupaj dhe tjetri në Durrës.
Konflikti me Eminin do të kishte pasoja shumë të rënda për “tmerrin” e Beratit pasi në vitin 1999, kur nëna e tij, Xhevrie Caka, do e vizitonte të birin që ishte arrestuar, ajo u rrëmbye pikërisht përpara derës ë komisariatit dhe më vonë u gjet e masakruar në pyllin e Semanit.
Lulzim Caka nuk vonoi të hakmerrej. Ai u arratis nga burgu dhe në mes të fshatit Samaticë vrau dy nga autorët e vrasjes së nënës së tij Valter Bega dhe Mariglen Cami. Në burg për vrasjen e Xhevrie Cakës janë edhe dy vëllezërit Artan dhe Bledar Yzeiri, të dënuar përkatësisht me nga 25 vite burgim secili.
Caka u arrestua në Itali më 24 dhjetor 2001 dhe u ekstradua në Shqipëri në vitin 2003, për të vuajtur dënimin 25 vjet burg për vrasje. Pas 16 vite prapa qelive që pas viti 2003, Caka i ka shlyer vitet e burgut. Sot ai ka lënë qelinë e burgut. /Opinion.al
