Lirimi i Gentian Dodës po i kushton shumë gjyqtarit të Apelit Shkëlqim Miri i cili ditën e sotme është ndaluar nga Prokuroria e Krimeve të Rënda me akuzën e korrupsionit pasiv. Ka dyshime se gjyqtari i ka marrë 20 mijë euro shtetasit Gentian Doda, për ti zbutur dënimin.
Gentian Doda akuzohej për vrasjen e dyfishtë të Gazmir Dedjes dhe Asllan Gjokës. Ngjarje e ndodhur në tetor të vitit 1997. Gjykata e Matit e kishte dënuar me 20 vite burg në mungesë. Ai qendroi për vite i arratisur dhe në 2012 u kap në Los Angjelos dhe u ekstradua në Shqipëri. Proceset gjyqësore ndaj tij janë ndjekur rreptësisht nga përfaqësues të ambasadës amerikane. Ata janë asistuar në disa seanca gjyqësore ndaj Dodës. Por edhe pse gjyqi ndaj tij ishte mjaft i rëndësishëm, gjyqtari i Apelit Shkëlqim Miri vendosi të bëjë rikualifikojë, duke ndryshuar akuzën nga “vrasje” në plagosje të rëndë.
Historia
Gentian Doda dhe viktima Gazmir Dedja kanë qenë anëtarë të grupeve rivale në Burrel, konflikti ndërmjet të cilëve ka vijuar për shumë vite dhe me shumë viktima. Përplasjet e ashpra ndërmjet dy grupeve rivale janë shtrirë edhe në qytete të tjera.
Në vitin 2010, në Tiranë është vrarë edhe vëllai i viktimës, Halil Dedja, i cili u gjet i vdekur në hyrje të pallatit ku banonte.
Ditën e ngjarjes së vitit 1997, autori Gentian Doda dhe viktima Gazmir Dedja janë konfliktuar verbalisht dhe më pas, i pandehuri e ka qëlluar me automatik, duke e plagosur rëndë. Nga plumbat ka mbetur i vdekur aksidentalisht edhe shtetasi Asllan Gjoka.
I plagosuri ka mundur të mbijetojë vetëm dy ditë për shkak të plagëve të marra, por ka arritur t’u tregojë familjarëve se kush e kishte qëlluar, duke identifikuar Gentian Dodën.
Nëna e tre djemve të vrarë letër prokurorisë e gjykatës: Kërkoj drejtësi!
Xhevrie Dedja, nëna 76-vjeçare e Gazmir Dedjas i ka dërguar një letër Prokurorit të Përgjithshëm, Ministrit të Drejtësisë, prokurorisë së Matit dhe gjykatës së këtij rrethi ku kërkon drejtësi për djalin e vrarë.
E moshuara thotë se nga viti 1997 asaj i është vrarë edhe djali tjetër si dhe bashkëshorti.
“Unë Xhevrije Dedja banuese në Mat jam bashkëshortja e të ndjerit Fehmi Dedja dhe nëna e tre djemve të ndjerë Gëzim, Halit dhe Gazmir Dedja, të gjithë këta tashmë të vrarë për hakmarrje, xhelozi dhe inate nga dora dhe urdhrat e kësaj bande kriminale të përbërë nga vëllezërit Admir dhe Gentjan Doda si dhe bashkëpunëtorët e të rekrutruar prej tyre”.
Më tej e moshuara thotë se është vënë në dijeni se në gjykatën e Matit është duke u rigjykuar i akuzuari për vrasjen e djalit të saj, i pandehuri Gentian Doda i cili është ekstraduar nga Shtetet e Bashkuara të Amerikës.
Ajo thotë se vëllezërit Doda akuzohen edhe për krime të kryera në Britani ku dhe i vëllai i tij po vuan dënimin për krime të ndryshme që kanë kryer në këtë shtet.
