Asnjë s’di të thotë nëse Bashkimi Europian ka humbur vlerat mbi të cilat u themelua, apo drejtuesit e tij sot, janë në nivelet më të ulta që ai ka njohur në thuajse gjysëm shekulli të ekzistencës. Nëse lexon telegramin e ngushëllimit që Federika Mogerini, Komisionere e Jashtme Europiane, i ka dërguar qeverisë Kubaneze, zyrtarisht në emër të BE, mbetesh më shumë se sa i befasuar. Mogerini flet për “Komandantin Fidel Kastro” që sipas saj, iku nga kjo botë në një kohë ndryshimesh dhe paqartësish. Toni gjithë keqardhje i telegramit bie ndesh me filozofinë mbi të cilën është ngritur BE dhe gjithë historinë e tij.
Mogerini ka harruar të flasë për disa miliona emigrantë politikë kubanezë që regjimi i Kastros i ka flakur përdhunshëm nga vendi në disa dekada.
Ka harruar të flasë për disa mijëra disidentë të regjimit të vrarë në mënyrë makabre thuajse direkt me urdhër të Kastros.
Ka harruar të flasë për disa qindra disidentë që ende vijojnë të qëndrojnë në burg dhe familjet e të cilëve ende persekutohen.
Zonja Mogerini, që duket se bindjet e majta i ka vendosur mbi vlerat e BE duhet të kujtojë që Kastro ka ardhur në pushtet më 1959, thuajse ato vite që po krijohej Bashkimi Europian. Ai ishte një bashkëkohës i etërve themelues të BE, De Gasperit, Adenaurit, Curcillit, Monnetit etj. Ai qëndroi në pushtet 57 vjet jo si pasojë e vlerave demokratike që përfaqëson BE, as falë zgjedhjeve të lira, por një sistemi diktatorial, që qëndron ende në këmbë duke shkelur liritë dhe të drejtat e njeriut dhe duke cuar thuajse në uri kronike popullin e tij.
Zonja Mogerini, nuk tha që Kastro ka qenë një ndër armiqtë e BE, që ka sulmuar idetë dhe qëndrimet e tij me fjalime të gjata, apo ka sfiduar sigurinë botërore me angazhime ushtarake si ato në Angola dhe Etiopi.
Mogerini nuk tha asgjë nga këto, thuajse përfaqëson partinë e saj të majtë dhe jo një formacion politik që ngrihet mbi vlera të tjera dhe të ndryshme nga këto. Që ngrihet mbi lirinë dhe të drejtat e njeriut, parime, që Fidel Kastro i reduktoi që ditën e parë që erdhi në pushtet dhe nuk i njohu më kurrë deri në vdekje të tij.
opinion.al
