Këtë të mërkurë, Armando Duka, presidenti i FSHF-së, prezantoi zyrtarisht për të gjithë publikun trajnerin e ri të Kombëtares shqiptare të futbollit. Christian Panucci do të jetë pasuesi i Gianni De Biazit, pasi sot firmosi edhe kontratën. Sipas Dukës, zgjedhja e Panucci-t si trajner është mëse e duhura për skuadrën tonë.
“Kemi zgjedhur që ekipin tonë ta drejtojë një nga emrat më të mëdhenj të futbollit italian, Christian Panucci. Ka një eksperiencë modeste, por unë jam i bindur që kemi bërë zgjedhjen më të mirë. Me stafin e tij dhe të gjithë ne do të bëjmë të mundur që të jemi pjesë e Euro 2020.” – u shpreh Duka për mediat.
Nga ana tjetër në deklaratën e tij, Panucci u shpreh se ndihej i nderuar për pozicionin e ri dhe se i vetmi objektiv që ai synon është “Euro 2020”.
“Falenderoj presidentin Duka për këtë detyrë që më jep emocione të mëdha, por mbi të gjitha është një përgjegjësi e madhe për vendin dhe Kombëtaren që e përfaqëson. Jam i bindur që kemi një skuadër shumë të mirë. Kemi katër ndeshje të rëndësishme përpara për eleminatoret e Botërorit, edhe pse është thuajse e pamundur kualifikimi, por që do të na shërbejë për t’u përgatitur për Europianin e 2020. Mezi pres që të filloj nga puna. Objektivi i vetëm dhe unik është 2020”. – u shpreh Panucci në deklaratë.
Por kush është Christian Panucci?
Panucci e nisi karrierën e tij në futboll me ekipin e Genoa-s në Itali në vitin 1990. Ai qendroi në këtë skuadër për tre vite për të shkuar më pas te skuadra e Milanit. Në vitin 1993 ai fitoi shumë tituj nën fanellën e Milanit përfshirë këtu atë të Serisë A si edhe UEFA Champions League në vitin 1994 ku ishte pjesë e një fitoreje spektakolare 4-0 kundër Barcelonës.
Ai ka qënë një nga zëvendësuesit kryesorë të Paolo Maldinit, Franco Baresi, dhe Alessandro Costacurta të cilët janë cilësuar si mbrojtësit më të mirë të të gjitha kohërave. Në vitin 1996, ai ndoqi ish trajnerin e Milanit Fabio Capello dhe shkoi të luante në Spanjë për skuadrën e Real Madridit me të cilin fitoi kupën e La Liga në vitin 1997 e ndërsa në vitin 1998 ai fitoi UEFA Champions League edhe me këtë skuadër.
Ai e mbylli karrierën e tij si lojtar në vitin 2012 me skuadrën e Parmës, për të marrë më pas poste menaxhuese. Ai fillimisht ishte asistent i Fabio Capello-s në skuadrën Kombëtare të Rusisë. Shqipëria është hera e tij e parë si një trajner zyrtar me të cilën ai shpreson të bëjë histori siç e tha edhe në deklaratën e tij./Opinion.al
