TIRANE- Emiljano Shullazi u ndalua mbrëmjen e së shtunës për tu marrë në pyetje pasi Berisha e akuzoi publikisht se ka kërcënuar kandidatin për rektor të UT-së, Mynyr Koni. Sipas Berishës, kërcënimi është bërë në emër të PS në mënyrë që të fitojë kandidatja tjetër, Klodeta Dibra. Ajo ç’ka u mësua pas shoqërimit është se prokuroria ngriti akt-akuzë për Shullazin, jo vetëm për kërcënimin e Konit, por edhe për gjobvënie dhe tritol ndaj një biznesi.
Opinion.al sot sjell fakte të reja rreth hetimeve për Shullazin. Burime konfidenciale dhe të sigurta thonë se Prokuroria e Krimeve të Rënda kishte nisur hetimet ndaj Shullazit që në fillim të muajit Shkurt. Këto hetime kanë marrë shkas nga një deklaratë e fortë e gazetarit Artan Hoxha në studion e emisionit “Opinion”. Hoxha, por edhe sekretari i Përgjithshëm i PD, Arben Ristani thanë live në studio se një grup i njohur kriminal në Tiranë i ka vënë gjobë përmes kërcënimit një biznesmemi të fuqishëm, pa i bërë publik emrin.
Emisioni me titull “Vrasës me uniformë policie” është transmetuar më datë 4 Shkurt dhe ne po ua sjellim edhe një herë në vemendje, momentin kur Artan Hoxha denoncon faktin se “gjatë 48 orëve të fundit një biznesmeni të njohur i është vendosur një gjobë”. Emisioni është realizuar më 4 Shkurt, ç’ka do të thotë se kërcënimi mund të jetë bërë më 1 ose 2 shkurt. Kush është ky biznesmen i fuqishëm? Dhe a kishte dijeni policia?
*Në video Balla-Hoxha-Ristani debat për policinë dhe bandat që vënë gjoba
