Policia ka vënë në pranga shtetasin Enea Bekteshi, pasi dyshohet se ishte brenda makinës tip “Audi” të blinduar që goditi makinën e zv/drejtorit të policisë në qytetin e Elbasanit me 18 shtator.
Bekteshi u arrestua sot pasdite në Cerrik nga forcat operacionale të Policisë së Shtetit në bashkëpunim me Policinë e Elbasanit.
Mësohet se emri i tij, figuron në shkresën që Prokuroria i kërkonte policisë t’a vinte në përgjim ambiental si pjesë e një bande të rrezikshme kriminale në qytetin e Elbasanit.
Ai dyshohet se është pjesë e grupit të njohur si banda “Çela” që disa muaj më parë, më 6 gusht 2017 qëlloi me antitank biznesin e fisit “Çapja”, hotel “Universin”, me të cilët kanë rivalitet në fushën e krimit.
Po ashtu Enea Bekteshi dyshohet të jetë pjesëtar në masakrën e 3 shkurtit në Elbasan.
Pas përplasjes në Elbasan, opozita shqiptare akuzonte se ne makinën “Audi” ndodhej Suel Çela, djali i biznesmenit Petrit Çela, pronarit të Tregut Agroushqimor.
Prej ditësh forcat speciale janë përqendruar në Elbasan, në disa aksione të gjëra, pasi ka ngritur zërin edhe vetë ministri i Brendshëm, Fatmir Xhafaj, por u deshën fjalët e forta të ambasadorit LU, që të shiheshin konkretisht rezultatet e aksioneve policore.
