Ditën e sotme gjatë një atentati mafioz në Mbikalimin e Shkozetit në Durrës mbeti i plagosur Prokurori, Arjan Ndoj.
Së bashku me të, u plagosën dhe dy persona të tjerë të cilët ndodheshin në makinën e prokurorit. Ata janë identifikuar si Aleksandër Laho, i njohur si Landi Muharremi, i cili është akuzuar 3 vite më parë për dhunimin e biznesmenit amerikano-libanez Faadi Mitri, për çështje pronash në Gjirin e Lalzit.
Ndërsa i plagosuri i tretë është shoferi i prokurorit, Andi Maloku, i cili është në gjendje të rëndë shëndetësore dhe ndodhet në Spitalin e Traumës në Tiranë. Mësohet se Andi Maloku ka qenë ish punonjës policie në Kruje dhe i hetuar më parë për disa konflikte.
Atentatorët po ecnin paralelisht me mjetin e prokurorit me targa AA 333 ZD, kur kanë qëlluar me breshëri arme në drejtim të tyre.
Deri më tani dyshohet se atentati ndaj prokurorit është bërë për shkak të detyrës po për zbardhjen e plotë të krimit mafioz është ngritur një grup i posaçëm hetimor nga departamenti i Policisë kriminale, prokuroria e rrethit gjyqësor Durrës dhe Drejtoria Vendore e Policisë Durrës,
Në vendin e ngjarjes ndodhen edhe kreu i Policisë së Shtetit, Ardi Veliu, kryeprokurorja Arta Marku si dhe drejtuesja e Prokurorisë së Krimeve të Rënda, Donika Prela./Opinion.al
