Prokuroria shqiptare nis hetimet kryesisht në të gjithë vendin për zjarrëvenie të qëllimshme pasi ka dyshime se zjarret janë vënë qëllimisht me synim kryesor përfitimin e fondeve publike.
Hetimet kanë nisur pas referimeve nga policia për 11 shtetas të ndaluar e proceduar për më shumë se 800 vatra zjarri në vend.
Sipas verifikimeve të informacioneve për zjarret në terren prokurorëve u ka rezultuar se këto zjarre janë në 80% të tyre në zona të pabanuara, larg rrugëve kryesore dhe në zona malore ç’ka hedh dyshime se zjarri nuk mund të ndizej vetë qoftë dhe nga temperaturat e larta.
Bazuar në këto referime dhe nga informacionet e raportuara nga shërbimet inteligjente grupi hetimor po analizon dhe të gjitha pagesat e kryera nga emergjencat civile, stacionet zjarrfikëse dhe pushteti lokal në vend, pasi përballimi i situatës së zjarreve ka krijuar një faturë të kripur për buxhetin e shtetit, raporton shqiptarja.com.
Hetuesit sqaruan se do të kontrollojnë edhe veprimtarine e kryebashkiakëve të cilët dhe pse kanë detyrim ligjor, 23 bashki nuk e ofrojnë fare këtë shërbim për qytetarët.
Këto hetime kanë nisur vetëm 2 ditë më parë pasi është analizuar edhe një raport konfidencial i agjencive të inteligjencës ku rezulton se zjarret janë krijuar në mënyrë qëllimshme për të dëmtuar kurorat e gjelbra në vend dhe mjedisin.
