Ku dallon një militant i orëve të para nga një njeri i ligjit që njeh të drejtat por edhe kufizimet që i atribuon detyra si ligjzbatues? Në fakt dhe për fat të keq militantizmi në ushtrimin e funksioneve publike është një sëmundje pa kurë në Shqipëri, ku më shumë se patologji e vetë individit është një produkt malinj që ushqehet vertikalisht nga kordoni i Partisë që e ka zgjedhur të bëjë papagallin me një ngjyrë; që nuk bën asgjë tjetër vetëm se imiton të zotin e tij gjatë gjithë kohës.
Të tillë butakë, pa shtyllë kurrizore, gjen shumë sot nëpër tryezat ligjore, që në vend që ti referoheshin zbatimit të normativës ligjore i kanë kthyer ligjet në krahë zogjsh pule, ku i shqyejnë sipas oreksit të tyre dhe të partisë ku militojnë.
Një i tillë është edhe rasti i sotëm i një anëtari të KQZ-së që mban edhe detyrën e zv/kryetarit. Që kishte derdhur të gjithë mërzitinë e tij pse drejtuesi i emisionit më të ndjekur në Shqipëri merret me listat e PD-së.
Sigurisht që as nuk kemi ndërmend ti japim llogari se si e bëjmë punën tonë. Por afërmendsh as nuk kemi pse heshtim për ti kërkuar llogari se mbi ç’tagër ligjor ndërhyn dhe merr përsipër të komentojë punën e një punonjësi të medias, ku sipas kornizës ligjore të Komisionit Qendror të Zgjedhjeve të vetmet komente që një anëtar i saj ka të drejtë të bëjë lidhen kryekëput me funksionimin ligjor të këtij komisioni.
Duke mbetur në këtë aspekt më duhet ti rikujtoj anëtarit të nderuar të KQZ-së, nenin 6 të Organizimit dhe Funksionimit të Komisionit Qendror Zgjedhor dhe detyrimet që rrjedhin nga ky nen i cili flet për detyrat e anëtarëve të KQZ-së.
Ku midis të tjera në pikën C shkruhet “të mbajë qendrime që janë në përputhje me vendimet, udhëzimet apo akte të tjera të KQZ-së, kur përfaqëson institucionin në marrëdhënie me të tretët, publikun dhe median” si edhe në pikën D citoj shkruhet : “të zbatojë dhe të respektojë normat e njohura dhe të gjithëpranuara të etikës në komunikim dhe sjellje.”.
Do mjaftonin këto dy pika për të vlerësuar se qëndrimi i këtij anëtari të KQZ-së ndaj një punënjësi të medias duke komentuar punën e këtij të fundit, duke dalë jashtë kornizës ligjore të një anëtari të KQZ-së është shkelje e hapur e etikës profesionale që nuk ka lidhje me punën e KQZ-së.
Ndaj e shikojmë të arsyeshme që ti tërheqim vëmendjen KQZ-së si organ në zbatim të ligjit që të zbatojë normat e përcaktuara në Kodin Zgjedhor dhe të mos bëhet palë në shkeljen e etikës ligjore. Njëkohësisht ti vejë fre militantizmit në radhët e anëtarëve të saj dhe jo ti legjitimojë si papagaj në shërbim të interesave të partisë ku aderojnë./ Shënim redaksional i Opinion.al
