Nga Moska, ku ndodhej në cilësinë e kryesimit që Shqipëria ka në OSBE, Kryeministri Rama është ndalur në një moment në raportet diplomatike mes dy vendeve. Sipas Ramës, marrëdhëniet mes Tiranës dhe Moskës kanë qenë në nivele të ulëta, ndërsa tha se prej kohës së Stalinit mes tyre, nuk ka patur raporte, telefonata, vizita apo trajnime.
“Nuk është sekret por fakt që marrëdhëniet tona janë në mjaft nivele mjaft të ulëta. Më tha ambasadori rus që Shqipëria është vendi i vetëm në botë që nuk ka pasur një telefonatë të vetme prej shumë vitesh, kam përshtypjen prej Stalinit, sepse kur iku Stalini ju lamë dhe ne. Kjo tregon gjithçka, asnjë telefonatë, e lere më vizitë apo trajtime”.
Duke kujtuar që mban zyrtarisht edhe pozicionin e Ministrit të Jashtëm të Shqipërisë, druajmë se Kryeministri nuk ka qenë i mirëinformuar në këtë informacion, për të cilin ka cituar ambasadorin rus.
Faktet flasin ndryshe.
Pas rënies së sistemit komunist, në raportet mes dy vendeve, ndonëse të pakta ka patur disa takime të nivelit të lartë. Kujtojmë në vitin 1991, takimin e Ramiz Alisë me Ministrin e Jashtëm rus, Eduard Shevernazde. 4 vite më pas, Presidenti i Shqipërisë Sali Berisha takoi në Moskë presidentin rus Boris Jelcin.
Edhe Kryeministri i asaj kohe Aleksandër Meksi ka patur një vizitë zyrtare në Moskë në vitin 1994, ku është pritur nga homologu Viktor Çernomerdin. Ndërkohë, në vitin 1999 gjatë krizës së Kosovës, Sergei Ivanov, atëherë Sekretar i Këshillit të Sigurisë së Rusisë, vizitoi vendin tonë.
Në vitin 2004, Ministri i Jashtëm i Shqipërisë Kastriot Islami është takuar me Sergey Lavrov. Ky i fundit, pikërisht në këtë vit, u emërua Ministër i Jashtëm i Rusisë, pasi kishte përfaqësuar vendin e tij në Kombet e Bashkuara.
Dy vjet më pas, në 2006, në Moskë ish-Ministri i Jashtëm Besnik Mustafaj pati një takim me homologun e tij rus Sergei Lavrov. Nga ky takim dokumentohet edhe një foto. / Opinion.al
