Kryeministri në detyrë i Kosovës, Albin Kurti i është përgjigjur deklaratave të një dite më parë të presidentit Thaçi i cili e akuzoi atë se ka hyrë në dhomën e përgjimeve të Postës dhe Telekomunikacionit të Kosovës.
Në një status në Facebook, Thaçi nuk ka reaguar drejtpërdrejtë për akuzat por shkruan se ato synojnë të ushtrojnë trysni mbi Gjykatën Kushtetuese.
Kurti akuzon Thaçin se kërkon të dëmtojë imazhin e SHBA në Kosovë dhe shton se ditët në vijim do të përcaktohet dekada e tretë e shekullit të XXI për Kosovën.
“Regjimi i vjetër po shpurdh nëpër studiot televizive. Ata refuzojnë ta kuptojnë se koha e tyre ka mbaruar. Po orvaten të rikthehen, përmes trysnisë mbi gjyqtarët e Gjykatës Kushtetuese. Sa herë që ne ua godasim korrupsionin, ata piskasin “Amelika, Amelika! Gleneli, Gleneli!”. Duan ta dëmtojnë imazhin e ShBA-ve në Kosovë, ta keqpërdorin atë si strehë për ultësinë e tyre. Një popull nuk iu nënshtrua një njeriu. Dhe, e bëri ndryshimin me 6 tetor. As qeveria në detyrë nuk i nënshtrohet këtij Presidenti helaq. Ditët në vijim përcaktojnë dekadën e tretë të shekullit XXI. Në cilën anë je ti?”- shkruan Kurti.
Presidenti i Kosovës, Hashim Thaçi tha një ditë më parë në një emision televiziv se Albin Kurti, Haki Abazi e Xhelal Sveçla duhet të japin përgjegjësi për futjen e tyre në dhomën e përgjimeve në PTK. Ai tha se në dhomën e përgjimeve ka të drejtë të hyjë vetëm kryeprokurori i vendit dhe akuzoi Kurtin se ka kryer një vepër penale. /Opinion.al
