Kryetari i Lëvizjes Vetëvendosje Albin Kurti u shpreh gjatë një takimi me ambasadorin e Shteteve të Bashkuara në Kosovë, Philip Kosnett se “do të jetë kryeministër për të gjithë qytetarët e Kosovës”.
Sipas rezultateve paraprake të zgjedhjeve të 6 Tetorit, partia e Kurtit ka fituar shumicën e votave, me një diferencë të ngushtë nga Lidhja Demokratike e Kosovës, e cila ka dalë e dyta.
Lëvizja Vetëvendosja dhe LDK-ja nuk e kanë përjashtuar mundësinë e një marrëveshjeje për formimin e qeverisë së re, edhe pse është thënë se negociatat do të nisin pas numërimit të të gjitha votave.
Në një komunikatë për mediat nga Lëvizja Vetëvendosje thuhet se “ambasadori Kosnett shprehu kënaqësinë e tij për mbarëvajtjen e procesit zgjedhor, pjesëmarrjen e lartë të qytetarëve dhe e uroi kryetarin Kurti për një fushatë që i adresoi shqetësimet e votuesve”.
Në komunikatë thuhet se ai e njoftoi ambasadorin se konsolidimi i brendshëm i Kosovës me ndërtimin e një shteti demokratik, sundim të ligjit, zhvillim ekonomik dhe progres shoqëror është prioritet që do ta zbatojë, meqë edhe nevojat e qytetarëve dhe vullneti i tyre i shprehur në këto zgjedhje ishin për këtë.
Analistët në Kosovë presin që negociatat për formimin e qeverisë së re të jenë të vështira.
Në zgjedhjet e 6 tetorit, Partia Demokratike e Kosovës, e cila ka udhëhequr për 12 vjet, ka dalë e treta – gjithnjë sipas rezultateve preliminare të Komisionit Qendror të Zgjedhjeve./Opinion.al/
