Kuvendi i Kosovës, po zhvillon këtë të premte një seancë të jashtëzakonshme, ku po diskutohet në lidhje me situatën në komunat në veri me shumicë serbe.
Gjatë fjalës së tij, kryeministri i Kosovës Albin Kurti u shpreh se konfliktet në veri ishin të planifikuara ndërsa hodhi akuza ndaj Beogradit duke e akuzuar si autor të ngjarjeve.
“29 Maj ditën e hënë, një pjesë e mirë e bandave kriminale që ishin me gjasë në tubimin e Vuciç më 26 Maj u kthyen të organizuar për ta eskaluar situatën. Eskalimi i situatës ishte i planifikuar, i mirëorganizuar dhe kishte autorë. Autor është Beogradi zyrtar. Ngritja e shqetësimeve të shumta për eskalim të situatës bëri që Serbia të ngrejë grupe kriminale që ta eskalojë situatën”, tha Kurti.
Sipas Kurtit, gjatë gjithë hallkave të procesit që nga zgjedhjet e krytarëve ne Veri ka pasur konsultim me ndërkombëtarët.
“Ka pasur jo vetëm konsultim, por edhe bashkërendim me partnerët ndërkombëtar. Ka qenë një proces me shumë hallka dhe hallka e fundit ishte shkuarja e kryetarit me çantë në vendin e punës. Pasuria e objekteve publike i takojnë Republikës së Kosovës. Përdorimi i tyre rregullohet me ligj në Kuvend”, u shpreh Kurti.
Ndër të tjera Kurti u ndal te protestat dhe tha: Jam i vetdijshëm që jo të gjithë ata që po marrin pjesë në protesta janë pjesë e grupimeve të tilla. Shumë qytetarë serbë janë të detyruar të shërbejnë si mburojë njerëzore për sulme të tilla kriminale.
