Në një intervistë për Pobjeda, kryeministri i Kosovës Albin Kurti ka thënë se nuk sheh asnjë ndryshim mes marrëdhënieve të shtetit që ai drejton dhe Serbisë.
“Në thelb, Serbia nuk e njeh shtetësinë e vendeve jashtë BE-së – Bosnjë dhe Hercegovinës, Malit të Zi, Kosovës, madje edhe Maqedonisë së Veriut. Përkundrazi, i konsideron këto shtete të përkohshme dhe angazhon të gjitha kapacitetet e saj për të shkatërruar shtetësinë e tyre”, mësohet të ketë thënë Kurti.
Në intervistën për Pobjeda, kryeministri i Kosovës tha se Serbia po sillet si një “Rusi e vogël” me vendet e saj fqinje.
Dëshmi janë edhe tensionet e fundit në kufirin Serbi-Kosovë, pas të cilave forcat e Kosovës u detyruan të reagojnë. Dy muaj pas incidentit, kryeministri i Kosovës Albin Kurti pohon se pavarësisht trazirave në kufi, marrëdhëniet mes dy vendeve kanë mbetur të pandryshuara.
“Marrëdhëniet mes Kosovës dhe Serbisë janë të njëjta: nuk janë as më të mira e as më të këqija”, sqaron kryeministri Kurti.
“Kemi të bëjmë me një shtet që nuk e njeh Kosovën, i cili është autokratik dhe pro Moskës. Nga ana tjetër, Kosova është shtet i pavarur dhe sovran, ka integritetin e vet territorial, por edhe shumë probleme”-tha Kurti./Opinion.al
