Kryeministri i Kosovës, Albin Kurti, në një intervistë për Sky News ka folur për sulmin terrorist të 24 shtatorit ku mbeti i vrarë polici kosovar, Afrim Bunjaku.
Kreu i Qeverisë kosovare ka thënë se Serbia dhe presidenti Aleksandër Vuçiç janë plotësisht të përfshirë në atë që ka ndodhur më 24 shtator.
Kurti e ka cilësuar Aleksander Vuçiçin si “Putin i vogël’, dhe Milan Radojiçiçin si “Prigozhini i vogël”, për të cilin thotë se Vuçiç e mban në malet rreth kufirit të Kosovës.
“Putini i vogël në Beograd, Aleksander Vuçiç, ka Prigozhinin e vogël në malet rreth Kosovës. Ai e pranoi që ka kryer sulmin terrorist. Ai është arrestuar si rezultat i presionit ndërkombëtar“, ka thënë Kurti.
Kryeministri Kurti më tej ka thënë se ajo çfarë kërkon Kosova është që Radojiçiç të sillet në Kosovë për t’ia bërë gjyqin, dhe thotë se për një gjë të tillë Kosova kërkon edhe përkrahjen e aleatëve.
“Kjo është çfarë kërkojmë, dhe kjo është në atë çfarë partnerët duhet të na ndihmojnë të arrijmë. Presioni ndërkombëtar bëri që Serbia ta arrestojë. Ai duhet të ekstradohet në Kosovë”, ka thënë Kurti.
