Albin Kurti dhe Isa Mustafa kanë zhvilluar sot një takim ku vendosur se 72 orë pas certifikimit të rezultatit të zgjedhjeve nga KQZ, ata do të shpallin koalicionin qeverisës mes partive që drejtojnë, Lëvizjes Vetëvendosje dhe Lidhjes Demokratike të Kosovës.
Klan Kosova raporton se takimi mes dy liderëve të partive ka patur në qendër harmonizimin e programeve për qeverisjen e ardhshme të Kosovës.
“Patëm një takim konstruktiv me kryetarin e LDK-së, Isa Mustafën, me ç’rast në të njëjtën kohë kishim edhe takimin e grupeve punuese që po harmonizojnë programin e ardhshëm qeverisës. Biseduam për mbarëvajtjen e procesit zgjedhor dhe u pajtuam që një orë pasi të certifikohen rezultatet nga ana e KQZ-së të takohemi për ta formuar koalicionin qeverisës. Një orë pas konfirmimit, ne do të takohem dhe brenda 72 orëve do ta arrijmë marrëveshjen tonë përfundimtare për koalicionin tonë qeverisës”, tha Kurti pas takimit.
Lideri i LDK-së, Isa Mustafa tha pas takimit se të dy partitë kanë arritur në shumë pika të përbashkëta për çështje të programit qeverisës dhe ritheksoi se do të takohet me Kurtin menjëherë pas certifikimit të zgjedhjeve për të shpallur koalicionin.
“Vlerësuam procesin e harmonizimit të programit qeverisës që është bërë mes dy subjekteve tona politike dhe erdhëm në përfundim që është arritur mjaft shumë sepse janë harmonizuar shumë çështje të politikave për zhvillim të vendit, fushës së arsimit, shëndetësisë, shtetit ligjor, formimit të organogramit të qeverisë së ardhshme në aspektin e ministrive. U morëm vesh që posa të bëhet certifikimi i rezultateve që të ulemi bashkërisht me ekipet që të merremi vesh për mundësinë e koalicionit dhe themelimit të qeverisë së përbashkët mes dy subjekteve tona. Kemi biseduar vetëm për atë që duhet të merremi vesh për marrëveshjen për koalicion për të gjitha pozitat me të cilat do të sfidohemi gjatë mandatit të ardhshëm qeverisës nëse arrijmë të bëjmë koalicionin”, deklaroi Mustafa.
I pyetur në lidhje me parterë të tjerë të koalicionit, Mustafa tha se kjo i takon partisë e cila del e para pas konfirmimit të zgjedhjeve nga KQZ. Sipas tij është partia që është votuar më shumë ajo që duhet të thërrasë partnerë në koalicion.
“Lista Serbe edhe partnerët e tjerë të koalicionit ne mendojmë se duhet ta bëjë ai që del i pari pas certifikimit. Nëse VV certifikohet si parti e parë dhe Kurti si mandatar i qeverisë atij i takon që t’i pret të tjerët dhe LDK-në, pastaj dinamika e ardhshme do të varet nga partia e parë”, shtoi ai. /Opinion.al
