Presidenti i vendit, Hashim Thaçi dhe kreu i Lëvizjes Vetëvendosje, Albin Kurti nuk do të takohen sot ashtu siç ishte paraparë.
Albin Kurti nuk do të shkojë në zyrën e Presidentit Thaçi për të marrë dekretin e mandatimit të kreut të qeverisë.
Klan Kosova raporton se takimi mes tyre që ishte paralajmëruar për në orën 12:00 nuk do të zhvillohet. Megjithatë, Presidenti Thaçi ia ka dërguar kreut të Lëvizjes Vetëvendosjes vendimin për nominim për postin e Kryeministrit të Kosovës me postë në zyrën e tij.
Më herët u lajmërua se Vetëvendosja i kishte dërguar Presidentit Thaçi propozimin për emërimin e Albin Kurtit si kryeministër i Kosovës. Pas kësaj, Thaçi e ftoi atë në presidencë në orën 12:00 por nuk dihet ende pse Kurti ka preferuar ta marrë dekretin nëpërmjet postës
Sot fillon edhe afati 15 ditor i mandatarit Kurti për formimin e Qeverisë.
“Kandidati për Kryeministër, jo më vonë se pesëmbëdhjetë (15) ditë pas emërimit, paraqet përbërjen e Qeverisë para Kuvendit të Kosovës dhe kërkon miratimin nga ana e Kuvendit”, theksohet në Kushtetutë. /Opinion.al
