Ish-kryeministri i Kosovës, Albin Kurti, ka bërë të ditur se nesër nuk do të bëjë pranim dorëzimin e detyrës së kryeministrit tek Avdullah Hoti.
Në një video-mesazh në Facebook, Kurti bëri një bilanc të punës së qeverisë së tij gjatë ditëve të saj në detyrë. Ai e quajti atë “qeverisje e mirë” por pranoi se nga dita e nesërme nuk do të jetë më në zyrën e kryeministrit.
Sa i përket qeverisë Hoti, Kurti tha se ajo është “qeveri koti” dhe e paligjshme ndërkohë që shigjetoi edhe vendimin e Gjykatës Kushtetuese.
“Aktgjykimi i fundit i Gjykatës Kushtetuese është i papranueshëm. Me atë vendim ata kanë bërë agresion mbi Kushtetutën e Republikës dhe kanë zhvlerësuar veten e tyre si Gjykatë”.
“Kjo qeveri është e paligjshme. Kjo është qeveria koti, ne jemi qeveria alternative. Nesër S’do ta bëj pranim-dorëzimin sepse s’mund të pranoj atë që e shkarkova, ndërkohë që edhe u dorëzua te presidenti. Ne vazhdojmë betejën, do të kthehemi përsëri e shumë shpejt”, tha Kurti.
Kuvendi i Kosovës votoi sot me 61 vota Qeverinë Hoti. /Opinion.al
