Kryeministri i Kosovës, Albin Kurti, ka reaguar pasi Komiteti Ministror i Këshillit të Evropës me mbi 2/3 e votave i dha sot mbështetje aplikimit të Kosovës në KiE.
Në një status në rrjetin social “Facebook”, Kurti thekson se Kosova do të jetë vlerë e shtuar në Këshillin e Evropës.
Më tej ai thekson se Këshilli i Evropës do t’i shtojë vlerë demokracisë, të drejtave të njeriut dhe sundimit të ligjit në Kosovë.
“Komiteti i Ministrave të shteteve anëtare, me mbi dy të tretat e votave të nevojshme, i dha sot mbështetje aplikimit të Kosovës në Këshillin e Evropës, duke përmbyllur kështu fazën e parë të anëtarësimit të plotë të Republikës sonë në këtë organizatë të rëndësishme ndërkombëtare”.
“Shteti ynë do të jetë vlerë e shtuar për Këshillin e Evropës. Këshilli i Evropës do t’i shtojë vlerë demokracisë, të drejtave të njeriut dhe sundimit të ligjit në shtetin tonë. Falënderoj ministrinë e Punëve të Jashtme dhe Diasporës, ministren Gërvalla, zëvendësministrin Ahmeti dhe ekipet e tyre për punën e pandërprerë, si dhe partnerët tanë e shtetet anëtare, për përkrahjen e pakursyer”, ka thënë Kurti.
