Një sasi eksplozivi shpërtheu në orët e para të mëngjesit të sotëm në verandën e një banese në Kurbin.
Klan News bën me dije se banesa ishte në pronësi të Skënder Likës.
Mësohet se Skënder Lika është xhaxhai i Ilir Likajt (Xhepajt), i arrestuar për vrasjen e dy biznesmenëve në një hotel në Mamurras, përkatësisht të shtetasve Paulin Gjergji dhe Bujar Lika.
Ndërkaq raportohet se vetë Skënder Lika është autori i vrasjes së Rakip Rolit. Nuk dihet ende nëse këto ngjarje kanë lidhje me vendosjen e eksplozivit këtë të premte.
Policia bën me dije se si pasojë e vendosjes së lëndës eksplozive janë shkaktuar vetëm dëme materiale, ndërsa grupi hetimor po merret me zbardhjen e plotë të ngjarjes.
“Në orët e para të mëngjesit, në Sanxhak, Kurbin, në veranden e banesës së shtetasit S. L., ka shpërthyer lëndë plasëse duke shkaktuar vetëm dëme materiale. Grupi hetimor në vendin e ngjarjes, po vijon veprimet hetimore për zbardhjen e ngjarjes, identifikimin dhe kapjen e autorit/ve”, thuhet në njoftimin zyrtar të policisë.
