Armando Sadiku e ka nisur në mënyrë fantastike pjesën e dytë të sezonit dhe ka debutuar me Vaduzin duke shënuar dy gola e duke dhënë dy asiste, në fitoren 5:2 në fushën e Luganos.
Kjo ka bërë që interesimi i mediave zvicerane të jetë i madh dhe tagesanzeiger.ch i ka marrë një intervistë të gjatë sulmuesit të kombëtares shqiptare, i cili ka folur për të shkuarën te Zyrihu, për të tashmen dhe synimet e tij, si dhe për kombëtaren.
Së pari, largimi nga Zurichu ka qenë një zhgënjim (është huazuar në Vaduz), por Sadiku nuk i mban mëri trajnerin Sami Hypia.
“Nuk mu bë qejfi që Zurichu e nisi me humbje vitin. Nuk kam pasur asnjë problem me trajnerin Hypia, nuk është e vërtetë që ai nuk më donte në skuadër”.
“Unë kam një synim madhor, të cilin dua ta arrij me çdo kusht. Është pjesëmarrja me Shqipërinë në Euro 2016. Fola me trajnerin dhe ai më mirëkuptoi, sepse nuk më garantonte aktivizim të rregullt në Zurich, ndaj vendosëm për largim”.
“Jam realist dhe pragmatist, bëhet fjalë vetëm për pak muaj dhe pastaj do të kthehem në Zurich, sepse Vaduzi nuk ka të drejtë blerjeje”.
Sadiku zbulon edhe diçka interesante: “Isha në kontakte me një klub të Bundesligës në janar, ishte Ingolstadt. Në fund, vendosa të refuzoja, sepse e dija që në Gjermani do të kisha më pak hapësira sesa te Vaduzi”.
“Ëndrra ime është të luaj në Kampionatin Evropian, do të ishte arritja ime më e madhe. Do të jem i lumtur dhe krenar në qoftë se mund të marr pjesë në këtë turne dhe të mbështes ëndrrën kombëtare shqiptare”, deklaroi Sadiku.
