Shpërndarja e ndihmave për banorët e zonave të prekura nga tërmeti vazhdon të mbetet problematike dhe e pakoordinuar.
Në shkollën “Leonik Tomeo” në Durrës, e cila është kthyer në një qendër grumbullimi për ndihmat që mblidhen për qytetarët, është krijuar një situatë kaotike.
Sipas banorëve, njësitë e qeverisjes vendore kanë shpërndarë disa kupona të me të cilët duhet të paraqiten pranë qendrave të grumbullimit për të marrë ndihma. Por mesa duket kjo mënyrë nuk ka ndihmuar për ta bërë efiçent procesin pasi një numër i madh qytetarësh janë paraqitur jashtë qendrës.
Njerëzit shtyhen me njëri-tjetrin me kuponët në dorë ndërsa të tjerë të pafuqishëm thonë se kanë nuk kanë marrë ndihma. Kjo situatë ka bërë që disa qytetarë të revoltohen dhe i gjithë procesi i shpërndarjes së ndihmave në gjimnazin “Leonik Tomeo” duket se ka ngecur.
Në një prononcim në telefon për ABC News, nënkryetari i Bashkisë së Durrësit i pyetur nga gazetarja se përse nuk po shpërndahen ndihmat thotë se duhet të marrin përgjigje te Shtabi i Emergjencës pranë Bashkisë Durrës, “merrni të gjitha përgjigjet atje, shpjegojuani ju qytetarëve se ku duhet ti marrin ndihmat”, tha ai. /Opinion.al
