Lojtarët e ekipit kombëtar të Iranit zgjodhën të mos këndojnë himnin e vendit të tyre në ndeshjen hapëse të Kupës së Botës kundër Anglisë këtë të hënë.
Sipas mediave të huaja ky veprim po shihet si një shenjë mbështetjeje për protestat që shpërthyen javë më parë në Iran në mbështetje të të drejtave të grave.
Lojtarët qëndruan të heshtur ndërsa himni po luhej në stadiumin ndërkombëtar Khalifa.
Sakaq, televizioni shtetëror iranian, gjatë transmetimit të tij të drejtpërdrejtë, censuroi pamjet e lojtarëve të rreshtuar në fushë, gjatë kohës që po luhej himni.
Mediat e huaja shkruajnë se, skuadra ka humbur shumë tifozë në Iran, pasi shumë njerëz po i akuzojnë ata se po ia mbajnë anën përgjigjes së dhunshme shtetërore ndaj protestuesve, përfshirë, këtu grave dhe fëmijëve të cilët kërkojnë rënien e Republikës islamike.
Ekipi i futbollit, që historikisht është konsideruar si krenari kombëtare, ka qenë në qendër të vëmendjes në Iran para fillimit të Kupës së Botës, pasi pritej të shihej nëse lojtarët do ta përdornin këtë turne të futbollit si një platformë për të treguar solidaritet me protestuesit.
Në prag të ndeshjes, kapiteni Ehsan Hajsafi, i cili luan në Greqi, u bë i pari anëtar i skuadrës iraniane që foli nga Kupa e Botës për situatën në shtëpi, duke thënë: Ne jemi me ta dhe i mbështesim ata.
Lojtarët Karim Ansarifard dhe Morteza Pouraliganji zgjodhën të mos u përgjigjen pyetjeve të premten në lidhje me solidaritetin me gratë në Iran, ndërsa mesfushori Alireza Jahanbakhsh, i klubit holandez Feyenoord, tha se pyetje të tilla ishin një tentativë për të shpërqendruar ekipin./Opinion.al
