Ambasadorja e Shteteve të Bashkuara të Amerikës, në vendin tonë Yuri Kim në fjalën e saj në konferencën për 110-vjetorin e krijimit të Gjykatës së Lartë është shprehur se Reforma në Drejtësi po vijon të prodhojë rezultate reale.
Kim ka thënë se tashmë Gjykata e Lartë ka 16 anëtarë ndërsa ka theksuar se 3 vakancat e mbetura duhet që të zëvendësohen sa më parë për të siguruar drejtësinë për shqiptaret.
“Kanë kaluar më shumë se 3 vite që jam këtu dhe kam pasur privilegjin të takoj shqiptarë nga të gjitha fushat e jetës. Më kanë thënë qartë se duan drejtësi, një arsye për të qëndruar në këtë vend. Reforma në Drejtësi vazhdon të prodhojë rezultate reale. Besimi në drejtësi po zëvendësohet me optimizëm të matur. Gjykata e Lartë ka gjëra për të qenë krenare. Nga 19 anëtarë kjo gjykatë kishte vetëm një gjyqtarë 4 vite më parë, sot ka 16 anëtarë. Vakancat e mbetura duhet të plotësohen sa më shpejt të jetë e mundur. SHBA-të janë krenare që mbështesin Gjykatën me çështje ekspertësh.
Me këtë përvjetor të veçantë është një kohë për të menduar për arritjet. Kundërshtarët e reformës në drejtësi duan që ajo të dështojë pasi po shohin se ajo funksionon. Do donin të fshihnin veprimet e tyre korruptive.
Kjo tregon se sa e rëndësishme është që të gjithë ne së bashku, GJL, SHBA, BE dhe organizatat partnere të qëndrojnë të përkushtuara ndaj kësaj detyre. Në fund i përket drejtuesve shqiptarë, Shqipërisë. Themeli i reformës së drejtësisë është ndarja e gjyqësorit nga ndikimi politik, por kjo është e pamundur nëse mbizotërojnë modelet e vjetra”, deklaroi Yuri Kim.
Kim theksoi se pavarësia dhe integriteti i sistemit të drejtësisë do të tërheqë investimet të huaja, do të sigurojë drejtësi dhe kushte të barabarta për të gjithë qytetarët shqiptarë. Po ashtu ambasadorja theksoi sërish se askush nuk është mbi ligjin.
“Do të tërheqë investimet të huaja, do të sigurojë drejtësi dhe kushte të barabarta për të gjithë qytetarët shqiptarë. Janë vendosur të gjithë mekanizmat ligjorë për të siguruar një sistem drejtësie të qeverisur nga shteti i së drejtës. Tani është koha që zyrtarët publikë pa përjashtim, pa përjashtim, të dyfishojnë përpjekjet për të zbatuar legjislacionin në përputhje me standardet ndërkombëtare. SHBA-të mbeten të përkushtuara për të mbështetur Shqipërinë, ndërsa ky vend ecën drejt integrimit, destinacionit euroatlantik. Puna që ju të gjithë po bëni është thelbësore për këtë”-tha Kim.
